Kur hekuri bëhet art: 23-vjeçarja Lindita Haliti që jeton mes shkëndijave të saldimit
Në një ambient ku zhurma e metalit dhe shkëndijat e saldimit janë përditshmëri, një 23-vjeçare nga Gjilani po ndërton një histori të veçantë force dhe vendosmërie.
Lindita Haliti është ndër të rrallat vajza në Kosovë që ka zgjedhur të sfidojë stereotipet gjinore, duke u bërë pjesë e një profesioni tradicionalisht të dominuar nga burrat – saldimit.
Për Linditën, ky nuk është vetëm një profesion teknik, por një formë shprehjeje dhe përkushtimi ndaj jetës.
Ajo ka përfunduar shkollën e mesme të arkitekturës, me ëndrrën për të vazhduar studimet dhe për t’u marrë me projektimin e ndërtesave. Por kushtet e vështira ekonomike e detyruan të ndërpresë rrugëtimin akademik. Sot, ajo jeton në një shtëpi sociale në Gjilan dhe mbart një përgjegjësi të madhe familjare, duke u kujdesur për nënën e saj me aftësi të kufizuara.
“Kam ëndërruar të shkollohem, por kushtet nuk më lejuan. Më duhet të punoj fort për ta mbajtur veten dhe nënën time,” thotë ajo, duke reflektuar mbi realitetin e saj të përditshëm.
Çdo mëngjes, Lindita udhëton drejt Ferizajt, ku punon në kompaninë “Metal Kosova”. Rruga e gjatë dhe puna fizike nuk e kanë ndalur atë. Përkundrazi, ajo i sheh si pjesë të një rruge që e çon drejt përmirësimit profesional.
Në vendin e punës, mes nxehtësisë dhe shkëndijave të metalit, Lindita e sheh saldimin si një “art” në vete.
“Për mua, saldimi është një proces magjik. Jetoj me ato shkëndija. Aty ku të tjerët shohin rrezik, unë shoh frymëzim,” thotë ajo.
Megjithëse fillimet nuk kanë qenë të lehta, ajo është përshtatur me punën e rëndë fizike dhe sfidat që sjell profesioni. Ndjenja e përmbushjes vjen sa herë që një projekt përfundon me sukses.
“Ndihem e përmbushur kur shoh një projekt të madh të përfunduar. Atëherë e kuptoj vlerën e punës sime,” shprehet ajo me vetëbesim.
Përtej angazhimeve profesionale, Lindita mbetet një e re aktive dhe me pasione të shumta. Muzika dhe sporti janë pjesë e jetës së saj, ndërsa kohën e lirë e kalon me shoqëri, duke ruajtur një balancë mes përgjegjësive dhe jetës rinore.
Pavarësisht sfidave, ajo nuk e sheh veten duke mbetur vetëm punëtore e një kompanie. Synimi i saj është i qartë – hapja e një punëtorie personale në Gjilan, ku dëshiron të ndërtojë të ardhmen e saj me duart e veta.
