Maturantët e Gjimnazit “Zenel Hajdini” vizitojnë UKZ-në
Nxënësit maturantë të Gjimnazit “Zenel Hajdini” në Gjilan kanë zhvilluar një vizitë studimore në Universitetin Publik “Kadri Zeka”, me synim që të njihen nga afër me programet studimore, ambientin universitar dhe mundësitë që ofron ky institucion për vazhdimin e studimeve të larta.
Kjo vizitë u realizua në kuadër të orientimit në karrierë dhe informimit të maturantëve për zgjedhjen e drejtimit të tyre akademik.
Të shoqëruar nga mësimdhënësit e tyre, nxënësit u pritën nga Dekani i Fakultetit të Shkencave Sociale, Prof. Asoc. Dr. Selim Daku, i cili ishte edhe organizatori i kësaj vizite, së bashku me stafin akademik dhe administrativ të këtij fakulteti.
Gjatë takimit, maturantët patën mundësinë të informohen në mënyrë të detajuar rreth programeve studimore që ofron Universiteti Publik “Kadri Zeka”, me theks të veçantë në Fakultetin e Shkencave Sociale. Ata u njoftuan për përmbajtjen e programeve, kushtet e studimit, mundësitë si dhe për perspektivat e punësimit pas përfundimit të studimeve.
Përveç prezantimit teorik, nxënësit vizituan edhe ambientet e universitetit, duke parë nga afër hapësirat mësimore, sallat e ligjëratave, laboratorët e ambienteve studimore dhe kushtet tjera që u ofrohen studentëve gjatë studimeve të tyre. Kjo i ndihmoi ata të krijojnë një pasqyrë më të qartë për jetën studentore dhe standardet akademike të universitetit.
Dekani Selim Daku theksoi rëndësinë e këtyre vizitave për të ndihmuar të rinjtë në orientimin e tyre profesional, duke i inkurajuar maturantët që të zgjedhin me kujdes drejtimin e studimeve dhe të shfrytëzojnë mundësitë që ofron Universiteti Publik “Kadri Zeka”.
Maturantët u shprehën të kënaqur me mikpritjen dhe informacionet e marra, duke vlerësuar se kjo përvojë ishte mjaft e dobishme për vendimmarrjen e tyre lidhur me të ardhmen akademike. Ata falënderuan stafin e universitetit për gatishmërinë dhe përkushtimin në prezantimin e ofertës studimore.
