Kamenica pjesë e ceremonisë së organizuar për Ditën e Mësuesit nga Ministria e Arsimit dhe Shkencës
Mësimdhënësja e ShFMU “Asllan Thaqi” nga Karaçeva, Rabije Idrizi, ka përfaqësuar Komunën e Kamenicës në ceremoninë tradicionale të organizuar nga Ministria e Arsimit dhe Shkencës me rastin e 7 Marsit, Ditës së Mësuesit, ku u ndanë mirënjohje për mësimdhënës të dalluar nga e gjithë Kosova. Në këtë ceremoni u nda edhe çmimi kryesor “Shaban Jashari” për mësimdhënësin më të mirë të vitit.
Drejtoria Komunale e Arsimit në Kamenicë kishte nominuar mësimdhënësen Idrizi si mësimdhënëse të dalluar e cila me këtë rast pranoi mirënjohje nga Ministria e Arsimit dhe Shkencës për kontributin dhe përkushtimin e saj në arsim.
Drejtori i Drejtorisë së Arsimit, Selami Klaiqi e uroi mësimdhënësen Rabije Idrizi për këtë vlerësim, duke shprehur mirënjohje për punën dhe angazhimin e saj në edukimin e brezave të rinj.
Njëkohësisht ai uroi të gjithë mësimdhënësit e komunës së Kamenicës me rastin e 7 Marsit, Ditës së Mësuesit, duke vlerësuar rolin dhe kontributin e tyre të çmuar në arsim.
