Studentët e FSHK-së krijojnë platformën inovative “Punësohu” që modernizon procesin e rekrutimit
Studentët e vitit të tretë të Fakultetit të Shkencave Kompjuterike në Universitetin Publik “Kadri Zeka” në Gjilan kanë mbrojtur me sukses projektin e tyre “Punesohu”, në kuadër të lëndës “Projekt”.
Projekti u realizua nga studentët Art Bugaçku, Almir Berisha, Drinor Kovani, Erblin Hiseni, Latif Kovani dhe Yll Kastrati, nën udhëheqjen e Prof. Ass. Dr. Afërdita Ibrahimi, e cila njëkohësisht është Dekane e Fakultetit të Shkencave Kompjuterike. Gjatë prezantimit, studentët demonstruan funksionalitetin e plotë të platformës, arkitekturën e sistemit si dhe logjikën e filtrimit të aplikimeve.
“Punesohu” është një platformë moderne për menaxhimin e punësimeve, e ndërtuar mbi një strukturë të qartë, të organizuar dhe funksionale. Qëllimi i projektit është të digjitalizojë dhe të optimizojë procesin e rekrutimit, duke e bërë atë më të shpejtë, më transparent dhe më profesional.
Platforma përbëhet nga tre module kryesore:
* Moduli i punëdhënësit, mundëson regjistrimin e kompanive, publikimin e shpalljeve të punës, përcaktimin e kritereve specifike dhe menaxhimin e aplikimeve në mënyrë të strukturuar.
* Moduli i aplikantit, u jep mundësi kandidatëve të krijojnë profil profesional, të listojnë aftësitë dhe përvojën e tyre, si dhe të aplikojnë në pozitat që përputhen me kualifikimet e tyre.
* Moduli i mysafirit, u mundëson përdoruesve pa llogari të shfletojnë shpalljet aktive dhe të informohen për mundësitë e punësimit.
Karakteristika kryesore dhe inovative e projektit është filtrimi paraprak përmes aftësive primare (obligative), të cilat i përcakton punëdhënësi gjatë hapjes së shpalljes së punës. Sistemi nuk lejon aplikimin e kandidatëve që nuk i plotësojnë këto kritere bazë, duke rritur ndjeshëm efikasitetin e procesit të përzgjedhjes.
Ky mekanizëm redukton aplikimet jo-relevante, kursen kohë për departamentet e burimeve njerëzore dhe siguron që vetëm kandidatët e përshtatshëm të hyjnë në fazën e shqyrtimit. Përmes kësaj qasjeje, “Punesohu” kontribuon në një proces më transparent, më të strukturuar dhe më profesional të rekrutimit.
Prof. Ass. Dr. Afërdita Ibrahimi përgëzoi studentët për përkushtimin, punën ekipore dhe nivelin e lartë të realizimit teknik të projektit. Ajo theksoi se projekte të tilla dëshmojnë përgatitjen serioze të studentëve dhe lidhjen e studimeve me nevojat reale të tregut të punës. “Ky projekt tregon qartë se studentët tanë janë të aftë të analizojnë probleme konkrete dhe të ndërtojnë zgjidhje funksionale e të aplikueshme në praktikë. ‘Punesohu’ është një shembull i mirë i integrimit të njohurive teorike me zhvillimin praktik të sistemeve softuerike,” u shpreh Prof. Ass. Dr. Afërdita Ibrahimi. Sipas udhëheqëses së projektit, njëherësh Dekane ne FShK Prof. Ass. Dr. Afërdita Ibrahimi, përmes projekteve të këtij niveli, Fakulteti i Shkencave Kompjuterike vazhdon të përgatisë kuadro të reja profesionale, të gatshme për tregun vendor dhe ndërkombëtar të punës.
Me këtë prezantim të suksesshëm, studentët dëshmuan jo vetëm njohuri teknike në zhvillimin e aplikacioneve, por edhe aftësi në analizë, dizajnim sistemesh dhe punë ekipore, duke e kthyer “Punesohu” në një model premtues për digjitalizimin e proceseve të rekrutimit.
