Studentët e vitit të tretë të FShK në UKZ prezantojnë me sukses projektin “Feedelate”
Studentët e vitit të tretë në Fakultetin e Shkencave Kompjuterike në Universitetin Publik “Kadri Zeka” në Gjilan, mbrojtën me sukses projektin e tyre në kuadër të lëndës “Projekt”, nën udhëheqjen e Prof. Ass. Dr. Afërdita Ibrahimi.
Gjatë prezantimit për projektin Feedelate, i realizuar nga studentët Lorjane Maliqi, Viol Aliaj, Agon Osmani, Zekrija Murati, Arb Hajdini dhe Fatlind Lubishtani, u dëshmua nivel i lartë profesionalizmi, kreativitet dhe aftësi për të ndërtuar zgjidhje konkrete me ndikim praktik në proceset e digjitalizimit dhe menaxhimit institucional
Projekti i prezantuar reflektoi punë ekipore të mirëorganizuar, përdorim të teknologjive bashkëkohore dhe qasje të orientuar drejt zgjidhjes së problemeve reale.
Feedelate është një platformë e integruar për menaxhimin e studentëve, profesorëve dhe administratës në një institucion arsimor. Sistemi është konceptuar si një zgjidhje e unifikuar që lehtëson komunikimin, organizimin dhe koordinimin e proceseve akademike.
Platforma ofron funksionalitete të shumta, ndër të cilat:
* Regjistrimin dhe menaxhimin e lëndëve
* Dorëzimin e projekteve dhe ideve inovative nga studentët
* Ofrimin e feedback-ut të strukturuar nga profesorët
* Menaxhimin e përdoruesve dhe roleve nga administrata
* Shqyrtimin, vlerësimin dhe arkivimin e ideve dhe projekteve
Përmes kësaj platforme synohet të përmirësohet transparenca, efikasiteti dhe bashkëpunimi ndërmjet palëve të përfshira në procesin akademik, duke krijuar një ambient më të organizuar dhe më funksional për zhvillimin e aktiviteteve mësimore.
Dekanaja e Fakultetit të Shkencave Kompjuterike, njëherësh udhëheqëse e grupi te studentëve Prof. Ass. Dr. Afërdita Ibrahimi, përgëzoi studentët për angazhimin dhe seriozitetin e treguar, duke theksuar se projekte të tilla dëshmojnë potencialin e madh të studentëve për të kontribuar në digjitalizimin dhe modernizimin e institucioneve arsimore.
