Komuna e Bujanocit në gjendje alarmante financiare
Edhe pse po i afrohemi fundit të muajit janar, punëtorët e administratës komunale dhe të të gjitha ndërmarrjeve publike të Komunës së Bujanocit ende nuk i kanë marrë pagat e muajit dhjetor, shkruan Bujanoci.Net, përcjell TV Gjilani.
Komuna e Bujanocit nuk i ka paguar as shpenzimet e rrugës për katër muajt e fundit. Pagesa e fundit e realizuar për shpenzimet e rrugës është ajo e muajit shtator.
Përveç pagave dhe shpenzimeve të rrugës, Komuna e Bujanocit po ballafaqohet edhe me shumë probleme të tjera serioze.
Barnatorja e qytetit, e cila funksionon në kuadër të komunës, ka 12 muaj që nuk ua ka paguar pagat punëtorëve të saj. Situatë e rëndë është edhe në Ndërmarrjen Publike “Komunalia”. Punëtorët e kësaj ndërmarrjeje vazhdojnë të jenë tri paga mbrapa, ndërsa qyteti po përballet me mungesë të ngrohjes qendrore në këto ditë të ftohta dimri.
Se Bujanoci ndodhet në krizë financiare, e dëshmon më së miri edhe fakti se Komuna e Bujanocit nuk ka arritur t’i shpërndajë subvencionet as për bizneset dhe as për bujqit që nga konkursi i vitit të kaluar.
Se çka po ndodh me Bujanocin mbetet të shihet, por ajo që është e qartë është fakti se kriza financiare e ka kapluar këtë komunë.
