Preshevë: Bie Perdja! Shfaqja “Gënjeshtra” e Teatrit të Gjilanit – shfaqja më e mirë e festivalit
Pas një rrugëtimi të suksesshëm të festivalit “Ditët e Komedisë Shqiptare – Presheva 2025”, zyrtarisht u bë mbyllja e Edicionit të XX-të të festivalit, i cili për 5 netë radhazi, me pasionin dhe etjen me të cilat përkufizohet publiku preshevar, edhe një herë tregoi përkushtimin, emocionin, kulturën dhe dashurinë për gjitha prurjet e teatrove mysafire në sferën e artit skenik që u prezentuan gjatë këtij edicioni.
Nikoqiri organizatorë i këtij evenimenti më të rëndësishëm kulturorë në Luginën e Preshevës, është shprehur falënderues, me theks të vecantë për të gjithë artëdashësit preshevar dhe mysafirët e festivalit të sivjetëm, të cilët sipas tij, për pesë netë rresht mbushën sallën e madhe të Shtëpisë së Kulturës, duke ndarë emocionet dhe duartrokitjet e tyre për lojën e bukur të aktorëve që performuan në skenë.
“Falënderojmë të gjitha trupat teatrore që kësaj radhe erdhën në Preshevë dhe atë: Produksionin “SAQ” , Teatrin e Qytetit tonë, Teatrin e Gostivarit, Teatrin e Qytetit të Gjilanit dhe Teatrin e Tetovës, për respektin e treguar ndaj publikut preshevar me profesionalizmin e treguar dhe emocionet e dhuruara gjatë pesë netëve të festivalit”, ka shkruar Naser Nuredini, nikoqir i këtij eventi.
“Falënderojmë Jurinë e Festivalit në përbërje: Valina Muçollit, Mehmet Pretenit dhe Sefedin Shabanit për përcjelljen e vëmendshme dhe profesionale, të cilët me vendimet e sakta dhe të pavarura përcaktuan fituesit e festivalit të këtij edicioni të cilët janë, si në vijim:
- Shfaqja më e mirë – ’Genjeshtra’, Florian Zeler – Produksion nga Teatri i Gjilanit
- Regjia më e mirë – Sylejman Rushiti, Teatri i Tetovës,
- Aktori më i mirë – Artan Ibishi, Teatri i Qytetit të Preshevës,
- Aktorja më e mirë – Qëndresa Jashari, Teatri i Gjilanit,
- Çmimi Special- Teatri i Gostivarit,
- Aktori Joprotagonist – Muhamed Tërtini, Produksioni “SAQ”
- Aktorja Joprotagoniste – Teatri i Gostivarit.
Falënderim të veçantë shprehim për gjithë mysafirët që na nderuan me prezencën e tyre së bashku me profesorin tonë të dashur Dr. Nebi Islamin. Gjithashtu mirënjohje për grupin e nxënësve të shkollës së mesme të cilët me shumë interesim u angazhuan në ndihmesën organizative të punëve e padyshim respekt dhe mirënjohje për gjithë punëtorët e institucionit tonë të cilët gjatë tërë kohës ishin në nivelin e detyrës të përkushtuar në mbarëvajtjen e suksesshme të festivalit.
I jemi mirënjohës publikut tonë, Teatrove të ardhur në Festival, mysafirëve dhe gjithë atyre që kontribuan në përfundimin e suksesshëm të Edicionit të XX Jubilar të të festivalit ” Ditët e Komedisë Shqiptare” Presheva 2025. Respekt për të gjithë!”, ka shkruar z. Nuredini.
