Derisa barnat mungojnë nëpër spitale, në Gjilan pritet të asgjësohen rreth 40 tonë për shkak të skadimit
Në Kosovë, qytetarët shpesh nuk i gjejnë barnat esenciale në spitale apo Qendra të Mjekësisë Familjare, atëherë kur më së shumti u duhen.
Në depon e Spitalit të Gjilanit po presin rreth 40 mijë kilogramë barna me afat të skaduar për t’u asgjësuar.
Procesi do të realizohet nga operatori ekonomik fitues, i licencuar nga Ministria e Mjedisit dhe Planifikimit Hapësinor.
“Asgjësimi i barnave dhe materialit medicinal sipas të dhënave të menaxhmentit drejtues të spitalit janë prezente qe 20 vite”.
Drejtori i spitalit te Gjilanit, Afrim Cana ka thënë se asgjësimin e ka kërkuar nga institucionet qëndrore për shkak se është duke ndodhur renovimi e spitalit i duhet hapësirë më shumë që e kanë nxënë këto barna që duhet të asgjësohen.
“E kemi kërkuar asgjësimin e barnave dhe materialeve shpenzuese për shkak se jemi duke krijuar aneks të ri në spital duke ndërtuar hapësira të reja. Në bashkepunim me MSH dhe ShSKUK është hapur tenderi ku do të procesohet në vazhdim me hapa të ri, dhe nuk dihet saktë se sa sasi janë për shkak se kur të fillojnë punën operatorët do t’i masin ato nga sasia apo ndryshe – pesha. Dhe kështu pasi është dhënë drita jeshile nga MSh për këtë kërkesë time do fillojmë edhe punët tjera”.
Më tej ai ka thënë se ende nuk dihet për operatorët që do të përzgjidhen pasi janë ende fazat e para.
“Sa i përket operatorëve janë dy në Republikë të Kosovës dhe pasi të arrihen të gjitha kriteret do të filloj asgjësimi i barnave dhe materialit medicinal, i cili është prezent në Spitalin e Përgjithshëm të Gjilanit“.
