Kurti: Do të shkoj me optimizëm dhe konstruktivitet në takimin te presidentja

Kryeministri në detyrë i Kosovës dhe kreu i VV-së, Albin Kurti, i cili të dielën dështoi ta formojë qeverinë e re, si i mandatuar nga presidentja Osmani, foli për takimin e sotëm që presidentja pritet ta ketë me krerët e partive politike në vend.

Kurti tha se në takimin me presidenten do të shkojë me “konstruktivet dhe optimizëm”.

Kurti foli edhe për dështimin e djeshëm të mbledhjes së Kryesisë së Kuvendit. Ai tha se nuk po e kupton se pse nuk po formohen komisionet parlamentare. Kurti tha se Kuvendi nuk duhet të varet nga Qeveria, por e kundërta.

“Takimi që do ta kemi me presidenten, besoj se do të diskutohet për hapat e mëtutjeshëm, meqenëse në tentimin e parë nuk pati qeveri të re. Dua të shkoj me konstruktivitet dhe optimizëm atje. Nuk kam arritur ta ndjek mbledhjen e djeshme të Kryesisë së Kuvendit, por mua më vjen mirë që deputetët e Kuvendit të Kosovës, të legjislaturës së nëntë, tashmë kanë shtëpi të tyre, veçse kjo shtëpi duhet të funksionojë. Funksionimi i Kuvendit nënkupton formimin e komisioneve parlamentare, unë nuk i kuptoj pse nuk i formojnë komisionet. Unë besoj në republikë demokratike në të cilën qeveria varet nga Kuvendi dhe jo e kundërta. Kuvendi duhet ta dëshmojë pavarësinë e vet. Ne varemi nga Kuvendi, jo Kuvendi nga Qeveria. Ata po vijnë në një kurth të ngritur nga vet prej tyre në të cilin e përmbysin raportin Qeveri-Kuvend”, tha Kurti në një konferencë për media.