Kurti: Po bëhemi gati për qeverinë Kurti 3, nëse s’ka, jemi të gatshëm për zgjedhje të reja

Kryeministri në detyrë, Albin Kurti, në konferencën e sotme është pyetur për formimin e qeverisë ku tha se dita e fundit e afatit 15 ditor për votimin e qeverisë është 26 tetori.

Ai deklaroi se njëherë janë duke e bërë analizën e rezultateve zgjedhore të ditës së djeshme, por shtoi se në këtë javë do të nisin bisedimet për qeverinë.

“Dita e fundit kur do të mund të mbahet seanca ku unë prezantoj kabinetin e ri qeveritar është 26 tetori. Këto ditë jemi të përqendruar në analizën e përgjithshme dhe të hollësishme të rezultateve të zgjedhjeve lokale por shumë shpejt, qysh në këtë javë do të fillojmë komunikimin dhe bisedat edhe për qeverinë qendrore sepse Kosovës i duhet edhe një mandat i ri i qeverisë sonë, neve na duhet një mandat tjetër në përputhje me rezultatin e 9 shkurtit sivjet por edhe unë si kryeministër në detyrë kam hyrë në muajin e 7 të vitit të pestë të mandatit të plotë katërvjeçar dhe duhet ta kemi një mandat rregullt i cili pa dyshim do të fillojë porsa ne ta nxjerrim në seancë përbërjen e re të qeverisë Kurti 3″, tha Kurti.

Ai tha se nuk e presin 26 tetorin për ta formuar qeverinë.