Krenari tjetër shqiptare në mjekësi – Dr. Durim Hasani nga Tërnoci, bëhet specialist i anesteziologjisë në Gjermani
Nga sot, emri i Dr. Durim Hasanit lidhet me një sukses të madh profesional dhe personal. Ai me shumë punë, përkushtim dhe sakrificë ka kaluar me sukses provimin e fundit, duke fituar titullin e specialistit të anesteziologjisë.
Dr. Hasani vjen nga fshati Tërnoc i Bujanocit, një vend që gjithmonë ka nxjerrë kuadro të shquara. Studimet i nisi në Fakultetin e Mjekësisë në Universitetin e Prishtinës, ndërsa ëndrrën e specializimit e kurorëzoi në Gjermani, në Baden-Württemberg, pranë mjekëve dhe profesorëve eminentë gjermanë që e udhëhoqën në rrugën e tij profesionale.
Ky sukses nuk është vetëm i tij – është i mbarë shqiptarëve në mërgatë, të cilët e ndjejnë sot këtë arritje si një nder dhe krenari, por edhe i vendlindjes që gjithmonë mbetet në zemrën e tij.
Durimi trashëgon dashurinë për profesionin nga familja, ngase babai i tij, specialist pediatër tashmë në pension, Dr. Bajram Hasani, për dekada me radhë i ka shërbyer me përkushtim fëmijëve dhe popullatës së komunës së Bujanocit dhe gjithë Luginës së Preshevës.
Arritja e Dr. Durimit është një shembull i gjallë se si përkushtimi, dashuria për profesionin dhe lidhja me rrënjët e veta, sjellin suksese që na bëjnë të gjithëve më krenarë.
FOLonline i uron suksese të mêtejme Dr.Durimit me bindje të plotë se karriera e tij nê asnjë mënyrë nuk përfundon me këtë titull.
Karakteri dhe përkushtimi i tij lë të kuptohet se shtigjet graduese do ti prekin majat e profesionit më human në botë.
