Bujanoc – Fillimi i vitit të ri shkollor me atmosferë festive
Me rastin e fillimit të vitit të ri shkollor, Shtëpia e Kulturës në Bujanoc, me mbështetjen e Komunës, organizoi një program të posaçëm për fëmijët që nisën klasën e parë.
Ky aktivitet solli një atmosferë festive, ku përveç programit artistik, u përcollën edhe mesazhe inkurajuese për fëmijët, mësuesit dhe prindërit.
Kryetari i komunës, Arbër Pajaziti, i përshëndeti të pranishmit me një fjalë urimi, duke theksuar rëndësinë e ditës së parë të shkollës si fillim i një kapitulli të ri në jetën e çdo fëmije.
Në fund të aktivitetit, për të gjithë nxënësit e klasës së parë u shpërndanë fletore dhe lapsa, si simbolikë e rrugëtimit të tyre drejt dijes.
“Uroj që ky vit shkollor të jetë i mbushur me dije, gëzim dhe arritje për të gjithë fëmijët e komunës sonë”, tha Pajaziti.
Ky organizim shënoi një fillim të gëzueshëm e motivues për më të vegjlit, duke i dhënë kështu një rëndësi të veçantë ditës së parë të shkollës në Bujanoc.
