KDI: Të shfrytëzohet mundësia e fundit për ta zhbllokuar Kuvendin, një dështim tjetër thellon krizën
Në ditën e fundit të afatit kushtetues për konstituimin e Kuvendit, organizatat e shoqërisë civile u kanë bërë thirrje të gjithë deputetëve që ta përdorin me përgjegjësi këtë mundësi të fundit për të përmbushur detyrimin e tyre kushtetues dhe për t’i hapur rrugë formimit të institucioneve të reja.
Përmes një komunikate për media, KDI thotë se dalja nga kjo krizë është ende e mundur, por kërkon vullnet dhe lidership politik.
“Partitë politike duhet të intensifikojnë përpjekjet për arritjen e konsensusit përmes kompromisit dhe bashkëpunimit. Kthimi në votimin e hapur për Kryetarin e Kuvendit, sipas praktikës së deritanishme, është hap kyç dhe i domosdoshëm për të mundësuar zhbllokimin institucional”, thuhet në komunikatë.
Sipas KDI-së, një dështim tjetër do të thellonte krizën aktuale dhe do të prodhonte pasoja të rënda politike, shoqërore dhe ekonomike për vendin.
“Prandaj, u bëjmë thirrje liderëve politikë dhe çdo deputeti që të veprojnë me maturi, përgjegjësi dhe në frymën e interesit publik”.
Ndryshe, sot mbahet seanca e 53-të konstituive me fillim nga ora 14:00, në ditën e fundit të afatit të Kushtetueses
