Opera e Kosovës sjell në Prishtinë Operën “Carmen” të George Bizet, gjilanasja Elonë Sadiku në rolin e Mercédès
Opera e Kosovës sjell në Prishtinë Operën ‘Carmen’ të George Bizet.
Katër aktet e veprës ‘Carmen’ të kompozitorit francez Georges Bizet do të interpretohen në Prishtinë më 22 dhe 24 korrik, nën organizimin e Operës së Kosovës, në ambientet e AMC Hall.
“Opera ‘Carmen’, e adoptuar nga novela e Prosper Mérimée, është një nga veprat më ikonike të muzikës klasike dhe realizmit në operë dhe mbetet një nga kryeveprat më të interpretuara në gjithë botën”, thuhet në njoftimin e “Opera e Kosovës”.
Rolet e operës do të jenë Carmen- Vikena Kamenica, Don Jose- Carlos Cardoso, Micaëla- Zana Abazi Ramadani, Escamilo- Vitaly Bilyy, Frasquita- Urta Haziraj, Mercedes- Elona Sadiku, La Dancaire- Denik Prizreni, Le Remendado- Rizah Jahaj, Zuniga- Shaban Behramaj, Morales- Harris Bajraktari.
Solistja e re gjilnase Elonë Sadiku do të paraqitet në rolin e Mercedes në Operën “Carmen”
Ja çfarë thuhet për Elona Sadikun në faqen zyrtare të “Opera e Kosovës”
Opera e Kosovës ka nderin të prezantojë Elonë Sadikun në rolin e Mercédès, në operën ‘Carmen’ të Georges Bizet
Elonë Sadiku, si soliste, ka interpretuar në Kosovë e Shqipëri, me Operën e Kosovë, ku dallohet performanca e saj në operën “Goca e Kaçanikut”.
Ajo është anëtare e Korit të Filharmonisë së Kosovës që nga viti 2021, ku ka performuar si soliste në veprën ‘St Mark Passion BWV 247’, nga J.S. Bach, si dhe në koncerte korale nën drejtimin e dirigjentëve si Ēriks Ešenvalds, Rafet Rudi dhe Hajrullah Syla.
Gjithashtu, ajo është pjesë e ansambleve vokale Remusica, Harmonius dhe Zanat.
Në vitin 2022, ajo fitoi çmimin e parë në garat ndërkombëtare të solokëndimit “Stojan Stojanov Gancev”, në Zagreb të Kroacisë. Veçohet performanca e saj në Sallën e Filharmonisë së Berlinit me veprën “Nëna Terezë” të kompozitorit Kreshnik Aliçkaj. Sadiku ka përfaqësuar Kosovën edhe në festivale ndërkombëtare, në vende si: Rumania, Gjermania, Belgjika, Senegali dhe Kazakistani.
