Ekspertët zbuluan një zakon të përditshëm që dëmton baterinë e telefonit tuaj
Nëse jeni ndër ata që e mbushin rregullisht telefonin deri në 100%, nuk jeni të vetmit – shumica e njerëzve duan të jenë të sigurt se bateria do t’u zgjasë gjithë ditën.
Disa madje e lënë pajisjen për t’u mbushur gjatë natës për të shmangur ndonjë shqetësim gjatë ditës. Por sipas mendimit të ekspertëve, ky zakon i dëmton baterinë në afat të gjatë, dhe më shumë se sa mendojnë shumica e përdoruesve.
“Bateria harxhohet më shpejt nëse e mbushni deri në 100%, krahasuar me mbushjen deri në një përqindje pak më të ulët”, tha Chao-Yang Wang, drejtor i Qendrës për Motorë Elektrokimikë në Universitetin Penn State, në një intervistë për Huffington Post.
Pse është problem mbushja deri në fund?
Dr. Dibakar Datta, profesor i inxhinierisë mekanike dhe inxhinierisë industriale në Institutin e Teknologjisë në New Jersey, shpjegon se funksionimi i vazhdueshëm i baterisë në tension të lartë (që ndodh kur vazhdimisht mbushet deri në 100%) shkakton plakje kimike të baterisë. Wang shton se nëse e mbushim gjithmonë deri në fund, mund të humbim 10 deri në 15 për qind të kapacitetit të baterisë gjatë jetës së saj, gjë që ndoshta nuk është dramatike, por me kalimin e kohës do të ndjehet.
“Nuk është ndonjë ndryshim i madh, por është i dallueshëm”, tha ai.
A është mbushja deri në 90% zgjidhja optimale?
Ekspertët rekomandojnë që, nëse e dini se nuk do ta përdorni shumë telefonin, të mos e mbushni atë deri në fund. Në shumicën e rasteve, thotë Wang, mbushja deri në 85 apo 90% është më se e mjaftueshme për nevojat e përditshme. Por, nga ana tjetër, nuk është problem nëse ndonjëherë e mbushni deri në 100%, sidomos nëse ju pret një ditë plot angazhime. Gjithçka varet nga situata dhe nevojat personale.
