Gjenerali i Ushtrisë turke viziton Gjilanin, pritet nga nënkryetarja Leonora Morina Bunjaku
Gjeneralmajori i Ushtrisë turke Mustafa Ozcan, me bashkëpunëtorë, ka vizituar Komunën e Gjilanit, përkatësisht Gjimnazin natyror “Xhavit Ahmeti”.
Ata fillimisht janë pritur nga nënkryetarja e Komunës së Gjilanit, Leonora Morina Bunjaku, si dhe drejtori e shkollës Bekim Mustafa dhe profesorë e nxënës të kësaj shkolle.
Nënkryetarja e Komunës, theksoi përkushtimin e saj për mikpritjen e ngrohtë për gjeneralin turk Mustafa Ozcan me shoqëruesit e tij në Gjimnazin e Shkencave të Natyrës “Xhavit Ahmeti”, e cila vizitë u zhvillua në atmosferë miqësore e frymëzuese për nxënësit, mësimdhënësit dhe udhëheqësit e shkollës.
“Ishte kënaqësi e veçantë që patëm mundësinë t’u shprehim mirënjohjen për mbështetjen e vazhdueshme, veçanërisht për kontributin e dhënë vitin e kaluar në hapjen e kabinetit të robotikës – një hapësirë moderne që tashmë është bërë burim kreativiteti dhe zhvillimi për nxënësit tanë”, tha veç tjerash, nënkryetarja, Leonora Morina Bunjaku.
Ajo poashtu theksoi se bashkëpunimi i këtillë forcon lidhjet ndërmjet komunitetit tonë dhe misionit të KFOR-it, e njëkohësisht fuqizon vizionin e përbashkët për një arsim bashkëkohorë dhe gjithëpërfshirës.
Nënkryetarja Leonora Morina Bunjaku, falënderoi Republikën e Turqisë për përkrahjen dhe miqësinë.
Mysafirët nga Turqia, kanë vizituar edhe kabinetin modern të robotikës, që është donacion nga shteti turk, derisa kanë bashkëbiseduar edhe me nxënësit.
