Enver Hasani: Duhet të hiqet pragu zgjedhor që të mos ketë ngërçe
09 Maj 2025 | 8:32
Ish-kryetari i Gjykatës Kushtetuese, Enver Hasani, ka propozuar heqjen e pragut zgjedhor prej 5 për qind për partitë parlamentare, ose uljen e tij në 1 apo 2 për qind, si zgjidhje për të shmangur ngërçet politike në konstituim të institucioneve.
Konstitutimi i Kuvendit ka dështuar tash e 12 seanca, teksa një përpjekje e re do të bëhet sot. Sipas Hasanit, kjo situatë s’do të përsëritej po që se s’do të kishte prag zgjedhor.
“Për të mos ndodhur ngërçi duhet hequr pragu. Të bëhet loja me më shumë aktorë. Kjo nuk e komplikon më tutje. Vijnë forca e individë të rinj. Jepet mundësi dhe Kuvendi bëhet më garues më divers. Ngërçi jam i bindur se i takon historisë sepse s’ka kush t’i mbajë… t’i abuzojë”, ka thënë ai në Koha.net.
Hasani ka vlerësuar se përpjekja e Lëvizjes Vetëvendosje që tash të kalohet pas disa votimeve të hapura në votim të fshehtë për emrin e kryeparlamentarit, është kundërkushtetuese. Sipas Hasanit, kjo përpjekje është “uzurpim i funksionit të kryetarit të Kuvendit”.
“Është skenar që u caktua më 8 prill nga kryesia e vjetër me kryetarin dhe forcat politike të kësaj legjislature. Dhe ai nuk mund të ndryshojë fare. Atëherë ka mundur të merreshin vesh për atë mënyrë. Por asnjë send nuk mund të ndryshojë nga ajo që është caktuar aty”, ka shtuar ai.
Hasani ka thënë se për t’i dhënë zgjidhje situatës aktuale duhet të bëhen 10 deputetë për të çuar kërkesë në Gjykatën Kushtetuese. Ai ka thënë se “Kushtetuesja duhet t’i japë rrugë se atë punë e ka”.
Paralajmërimin që presidentja Vjosa Osmani t’i takojë liderët e partive politike, Hasani e ka vlerësuar jo shumë me peshë. Ai ka thënë se presidentja nuk ka mandat për formim të organeve.
Ndryshe, deputetët do të mblidhen sërish sot në një përpjekje të re për konstituimin e Kuvendit të Kosovës. Procesi ka ngecur tek zgjedhja e Kryetarit të Kuvendit. Lëvizja Vetëvendosje, si parti fituese, po insiston në zgjedhjen e Albulena Haxhiut, edhe atë më votim të fshehtë.
Partitë tjera po e kundërshtojnë këtë. Disa herë ia kanë bërë të qartë VV’së se emri i Haxhiut s’do të kalojë asnjëherë. Më së shumti vota që ka marrë në votime kanë qenë 57. Për t’u zgjedhur i duhen 61.
