Propozimi i LDK’së për qeveri të tranzicionit, Krasniqi: E diskutojmë nesër në Kryesi
Propozimin e LDK’së për krijimin një qeverie unifikuese, që përfshinë në Qeveri tranzicioni të gjitha partitë shqiptare, deri në zgjedhjen e Presidentit të ri, vitin që vjen, Partia Demokratike e Kosovës do ta diskutojë nesër në Kryesi, ka konfirmuar kreu i PDK’së, Memli Krasniqi.
Krasniqi ka deklaruar se nesër do të diskutojnë për të gjitha zhvillimet politike dhe hapat tutje. Ai tha se është informuar mbi këtë propozim dhe se vendimet për propozime të tilla merren në organet e partisë.
”Qëndrimet tona lidhur me situatën e krijuar janë të qarta dhe konsistente. Ne kemi theksuar vazhdimisht se vendi nuk mund të mbetet peng i interesave të ngushta politike dhe se bllokada institucionale është pasojë direkte e qasjes së papërgjegjshme dhe imponuese të Lëvizjes Vetëvendosje, e cila po insiston me çdo kusht ta mbajë vendin në krizë. Sa i përket propozimit të LDK-së, jam i informuar tashmë. Gjithsesi, vendimet e rëndësishme ne i marrim në organet e partisë, andaj nesër, në mbledhjen e rregullt të Kryesisë do të diskutojmë për të gjitha zhvillimet politike dhe për hapat e mëtejshëm”, ka deklaruar Krasniqi media.
