Presidenti Begaj viziton shtëpinë e heroit, Rexhep Mala, vajza e heroit, Fitore Mala: “Historia flet. E vërteta ngadhënjen. Kujtesa jeton”
Në vazhdën e aktiviteteve dy ditore në Gjilan, Presidenti i Shqipërisë, z. Bajram Begaj, ka zhvilluar një sërë vizitash ndërsa është pritur me respekt të vecantë, gjithandej.
Në kuadër të agjëndës së ngjeshur Presidenti Begaj ka qëndruar në shtëpinë e simbolit të qëndresës kombëtare, heroit Rexhep Mala, për të kujtuar dhe nderuar veprën sublime e veprimtarinë heroike të tij.
Një dedikim të posacëm për shtëpinë tanimë të shpallur “Monument i Mbrojtur nga Shteti” nga Qeveria e Republikës së Kosovës, ka pasur vajza e heroit, Fitore Malaj.
“Plot 41 vite më parë, në majin e vitit 1984, pushteti i Beogradit – përmes gazetës “Politika” – e shpallte këtë shtëpi si “shtëpi terroriste”, duke e stigmatizuar si vatër të rezistencës që duhej shuar me çdo kusht”, ka shkruar ajo.
“Kjo ishte një nga ato shtëpi që u “vizitua” dhjetëra herë nga policia famëkeqe e UDB-së jugosllave, në përpjekje për të frikësuar, për të thyer shpirtin e qëndresës. Atëherë u shpall armike. Sot, pas më shumë se katër dekadash, kjo shtëpi e vuajtjes dhe e krenarisë kombëtare – e shpallur “Monument i Mbrojtur nga Shteti” nga Qeveria e Republikës së Kosovës – mirëpret me nder Presidentin e Shqipërisë, z. Bajram Begaj. Historia flet. E vërteta ngadhënjen. Kujtesa jeton”, ka vijuar më tej Fitore Malaj, në postimin e saj në rrjete sociale.
Kujtojmë që Presidenti Begaj gjatë ditës së sotme është nderuar me titullin ”Doctor Honoris Causa”, nga Universiteti “Kadri Zeka” në Gjilan, ndërsa një ditë më parë, ai është shpallur “Qytetar Nderi” i Komunës së Gjilanit.
