Prishtina e Cavallit mposhtet edhe nga Dukagjini
Dukagjini ka fituar në udhëtim te Prishtina me rezultat 1-0 në ndeshjen e vlefshme për xhiron e 24-të në Albi Mall Superligën e Kosovës.
Ekipi i Jean Michel Cavallit ka shkuar në gjashtë ndeshje radhazi në pranverë pa e shijuar fitoren, duke rënë xhiro pas xhiros më poshtë në renditje.
Pjesa e parë e ndeshjes u karakterizua me lojë thuajse të barabartë nga të dyja skuadrat, por me vetëm mysafirët që gjeten rrugën e rrjetës.
Goli i vetëm në këtë pjesë erdhi në minutën e 18-të me anë të Altin Mërlakut, i cili shënoi për 0-1 pas një gabimi të dyfishtë, nga Ardi Ajdini e pastaj nga Ardin Nika.
Në pjesën e dytë, Prishtina u hodh e gjitha në sulm duke tentuar golin e barazimit, por pa sukses dhe ndeshja përfundoi me fitoren e Dukagjinit 1-0.
Pas kësaj fitore, Dukagjini e sheh veten në pozitën e shtatë me 31 pikë, po aq sa Prishtina e gjashta.
Në ndeshjen e ardhshme, klinasit e presin Dritën, teksa prishtinasit udhëtojnë te Gjilani.
