Promovohet botimi “Muslimani bashkëkohës”, i autorit të ndjerë, hfz. Avni ef. Aliu
Në teatrin e qytetit të Gjilanit u mbajt ceremonia e promovimit të botimit të ri “Muslimani bashkëkohës”, një vepër e autorit të ndjerë, hfz. Avni ef. Aliu.
Aktiviteti u organizua nga Këshilli i Bashkësisë Islame në Gjilan, duke mbledhur personalitete të shquara nga fusha fetare, akademike dhe publike.
Kryetari i Këshillit të BI-së së Gjilanit, Naim ef. Aliu, vlerësoi këtë botim si një thesar të çmuar të trashëgimisë së përkushtimit ndaj Islamit dhe pasionit për edukimin islam.
Ndërsa Vedat ef. Sahiti, kryeimam i Kosovës dhe Ramadan ef. Shkodra, drejtor për Shtyp dhe Veprimtari Botuese në Bashkësinë Islame të Kosovës, theksuan rëndësinë e figurës së hfz. Avni ef. Aliut si një nga emrat më të ndritur të publicistikës islame në gjuhën shqipe.
Profesor Hysen Matoshi e cilësoi autorin si një veprimtar të shquar të çështjeve fetare dhe kombëtare, i cili la gjurmë të pashlyeshme me kontributin e tij në fushën e publicistikës.
Në emër të familjes, vajza e autorit, Albina Aliu-Idrizi, ndau momente personale, duke theksuar virtytet e larta të babait të saj dhe përkushtimin e tij ndaj fesë, kombit dhe dijes.
Hfz. Avni ef. Aliu mbetet një figurë e shquar e publicistikës islame dhe një shembull i denjë i përkushtimit për fe dhe atdhe, duke lënë një trashëgimi të vyer për brezat e ardhshëm.
