IPK rekomandon suspendimin e tre policëve që rrahën 16-vjeçarin gjatë ndeshjes sportive
Inspektorati Policor i Kosovës (IPK) respektivisht Departamenti i Hetimeve ka pranuar përmes Linjës së Kaltër (numri i telefonit pa pagesë 080003333) ankesë nga një qytetar i cili ankohej për tejkalim të autorizimeve policore gjatë përdorimit të forcës nga zyrtarë policorë në Drenas.
Ngjarja është raportuar të ketë ndodhur më 10 qershor 2024 në Drenas, rreth orës 20:00h, në një ndeshje në palestrën sportive, ku pas përfundimit të saj zyrtarët policor kishin arrestuar një të dyshuar.
Rasti është regjistruar në IPK dhe hetuesit janë angazhuar duke ndërmarrë veprime konkrete hetimore.
Pas disa veprimeve hetimore në konsultim me prokurorinë kompetente hetuesit e IPK-së në interes të hetimit kanë dhënë rekomandimin për suspendim nga detyra për tre zyrtarë policorë të cilët janë të dyshuar për veprën penale “keqtrajtim gjatë ushtrimit të detyrës zyrtare”.
Veprimet e mëtutjeshme hetimore lidhur me këtë rast do të vazhdojnë nga hetuesit e IPK-së në konsultim të vazhdueshëm me prokurorin përgjegjës.
