Abdixhiku homazhe te varri i Rugovës: Themeloi e udhëhoqi lëvizjen më të madhe shqiptare për liri e pavarësi

Kryetari i Lidhjes Demokratike të Kosovës, Lumir Abdixhiku me bashkëpunëtorë ka bërë homazhe te varri i Presidentit Historik, dr. Ibrahim Rugova në 16 vjetorin e pavarësisë së Kosovës.

Kryetari i LDK-së po ashtu shprehu mirënjohje e falënderim për të gjithë miqtë dhe aleatët e Kosovës.

“Nderojmë Atin Themeltar të Republikës, Presidentin Rugova, arkitektin e pavarësisë e shtetësisë!  Prijësi bëri rrugën e vështirë. Për liri, për pavarësi, për demokraci. Na mbetet ne të bëjmë të ardhmen. Rrugëtimi ynë si shtet krenar, me njerëz të jashtëzakonshëm e të ardhme të ndritshme do të vazhdojë. Sepse ky rrugëtim s’ka kthim mbrapa. Sepse Kosova, atdheu ynë, është i përhershëm. Sepse Republika është e përhershme dhe e pavdekshme“ ka shkruar Abdixhiku.

Abdixhiku gjatë ditës me  bashkëpunëtorë ka nderuar jetën dhe sakrificën sublime të Komandantit Legjendar, Adem Jashari dhe Familjes Jashari në 16 vjetorin e pavarësisë së Kosovës.

Kryetari Abdixhiku ka thënë se: “Në këtë 16 vjetor të pavarësisë po shprehim nderimet më të larta në këtë tempull të lirisë, për të nderuar sakrificën e Jasharajve, sakrificën e komandantit legjendar Adem Jashari dhe nëpërmjet këtij nderimi kujtojmë dhe të gjithë të rënët në përpjekjen tonë çlirimtare për liri, pavarësi e demokraci. Në këtë 16 vjetor ne kujtojmë me përulje dhe rikujtojmë veten po ashtu, se sa e shtrenjtë dhe sa e shenjtë është liria dhe shtetësia e Kosovës. Prandaj, mbi këtë sakrificë së bashku me aleatë, me shpresën për një vend më të mirë, një të ardhme më të shëndoshë, ju urojë të gjithëve festën e pavarësisë!”