U pensionua Fatmir Latifaj, drejtor në SHMU ”Mulla Idris Gjilani” në Velekincë
Pas një pune 40-vjeçare në arsim, këtë të enjte ka mbërritur moshën e pensionimit Fatmir Latifaj, drejtor në Shkollën e Mesme të Ultë ”Mulla Idriz Gjilani” në Velekincë.
Në këtë ditë të veçantë, në këtë shkollë është organizuar një ceremoni përcjellëse, ku kanë marrë pjesë kolektivi i shkollës dhe mysafirë të shumtë, të cilët kanë çmuar lart punën e mësimdhënësit dhe drejtorit Fatmir Latifaj.
Në këtë ngjarje ka marrë pjesë edhe Albana Demiri, drejtoreshë e Arsimit në Gjilan, e cila ka çmuar lart punën e drejtorit Fatmir Latifaj dhe organizimin e kësaj ngjarje. Ajo tha se kanë pasur bashkëpunim të shkëlqyeshëm, duke e cilësuar drejtor shembull.
“Ai ka dhënë kontribute për këto vite dhe ai do të ngelet model i një drejtori të mirëfilltë”, tha drejtoresha Demiri, duke e cilësuar Latifajn mësimdhënës dhe udhërrëfyes të përkushtuar, ndërsa është shprehur e bundur se ai nuk do të ndalet as në vitet e pensionimit, duke mos rreshtur së dhëni kontributin e tij të mëtejmë.
Naile Aliu, mësimdhënëse, është paraqitur me një fjalë rasti duke e falënderuar drejtorin për tërë kontributin që ka dhënë.
Në emër të fshatit ka folur profesori Skënder Bajrami, i cili ka uruar ditëlindjen dhe pensionimin e drejtorit Latifaj, për të cilin tha se në këtë shkollë punoi për vite me radhë si mësimdhënës e si drejtor, duke arritur suksese të mëdha.
“Sot nuk po largoheni nga kjo shkollë. Ju merrni falënderimet e zemrat tona”, tha Bajrami duke e nderuar me mirënjohje drejtorin e pensionuar në emër të fshatit.
Me këtë rast, drejtori Fatmir Latifaj i është drejtuar komunitetit dhe prindërve të fshatit Velekincë, ku e ka selinë shkolla, sikurse që i është drejtuar edhe anëtarëve të kolektivit dhe nxënësve, të cilët i ka cilësuar familje të dytë dhe i ka falënderuar për këtë përgatitje që i është bërë, kurse nuk ka lënë pa përmendur edhe miqtë dhe familjarët.
Ai tha se ndjehet i emocionuar nga fjalët që ka dëgjuar nga drejtoresha e Arsimit, Albana Demiri, por edhe nga komuniteti i fshatit. Tutje Latifaj ka thënë se të gjitha sukseset e arritura i ndanë me të gjithë tjertë, ngase sipas tij, pa mbështetjen dhe kontributin e secilit ato nuk do të arriheshin. Në fund drejtori Fatmir Latifaj uroi që në këtë shkollë të rritet cilësia edhe më shumë.
Burimi i lajmit: /kryelajmi.com/.
