Tërnoc: Ndërron jetë ‘emblema’ e tifozërisë së futbollit, Burhan Ismaili-Buli

Sot ka ndëruar jetë në moshën 55-vjeçare, njëri nga tifozët më të flaktë të KF Tërnoci, Burhan Ismaili-Buli.

Lajmi për vdekjen e tij i ka pikëlluar të gjithë ata që kishin rastin ta njihnin fizikisht dhe shumë më shumë se kaq, pasi Buli ishte nga ata tifozë që të bënte për vete.

Ai njihej si njëri nga aderuesit e flaktë të klubit të zemrës, vecanërisht gjatë viteve 90-të të shekullit të kaluar, duke qenë se e përcillte gjithandej skuadrën e tij dhe futbollistët e klubit, si në futboll të vogël ashtu edhe në atë të madh.

Buli njihej edhe përtej Tërnocit e Bujanocit, gjithandej, si në Kosovë ashtu edhe Maqedoni të Veriut, pasi vazhdimisht përcillte ndeshjet e ekipit të tij dhe lojtarët e mirënjohur të shumë gjeneratave që ishin me prejardhje nga Tërnoci e që herë-herë mbronin ngjyrat e ndonjë skuadre tjetër, si KF Kika nga Hogoshti etj.

Buli madje ishte i mishëruar edhe me futbollin e vogël që gjatë viteve 90-të ishte tejet masiv në Anamoravë, gjegjësisht në Komunën e Kamenicës, në Mini-Ligën e atëhershme, në të cilën zhvillonin aktivitete sportive të integrura edhe disa klube të organizuara nga komuna e Bujanocit, përfshirë KF Tërnoci, në radhët e të cilit ekip luanin futbollistë të spikatur.

Kudo që kishte aktivitete sportive Buli dosido do të gjendej në mesin e tifozëve, qoftë në tribuna apo pranë e pranë bankinës së klubit të tij të zemrës. Me Bulin ishin të miqësuar të gjithë që e njihnin, ndaj e stimulonin që të shfaqte aderimin dhe admirimin e tij e t’i gëzohej performancave të suksesshme të ekipit të zemrës, gjithnjë, kudo e kurdo, pasi vërtetë ishte një “ikonë” emblematike e futbollit.

Lajmi për ndarjen nga jeta të Bulit ka piklluar të gjithë ata që e njohën nga afër, si ish-futbollistët e tërë komuniteti i fshatit Tërnoc e më gjërë.

Varrimi i të ndjerit bëhet të hënën, në ora 15:00h, në varrezat e fshatit Tërnoc të Komunës së Bujanocit!