Në Universitetin Shtetëror të Guvernatorëve në Chicago tani valon edhe flamuri i Kosovës
Në hyrjen kryesore të Universitetit Shtetëror të Guvernatorëve në Chicago të SHBA-ve qëndrojnë disa flamuj të vendosur lart, që kanë të bëjnë me shtetësinë e studentëve në këtë universitet.
Mes tyre, tani valon edhe flamuri i Kosovës. Kjo është bërë e mundur falë gjilanases Vana Jerliu Ramadani.
Vana është duke kryer magjistraturën e tretë në këtë universitet së bashku me 5 fëmijët e saj, që të gjithë studentë në këtë universitet.
Ajo kishte bërë kërkesë që flamuri i Kosovës të vendoset në këtë universitet, për ta prezantuar prejardhjen e saj. Ishte njoftuar se flamuri i Kosovës nuk gjendej mes flamujve tjerë, të cilët vendosen aty në bazë të informatave në data bazën e universitetit, pasi asnjë student nuk ishte nga Kosova.
Vana dhe familja e saj ishin ne data bazë si shtetas amerikanë e jo si kosovarë. Edhe pse e kishte të qartë arsyen, prapëseprapë nuk u ndal së insistuari në kërkesën e saj, sepse prejardhja e saj ishte nga Kosova.
Madje ishte pyetur pse kaq shumë po insistonte për flamurin. Përgjigja e saj ishte se po që se do ta shihte flamurin e Kosovës në këtë Universitet, mes flamujve tjerë, kjo do të bënte atë të ndihej shumë e lumtur.
Një ditë ajo mori përgjigje se universiteti kishte porositur flamurin online dhe po prisnin derisa te vinte me postë.
Dhe, ditën e martë, kur Vana doli nga ligjëratat si zakonisht shikoi lart tek flamujt e vendosur dhe pa flamurin e Kosovës mes tyre.
Shumë e emocionuar, kishte u kishte treguar studentëve që ishin afër se “ky është flamuri im, flamuri i vendit tim, flamuri i Kosovës, flamuri që më prezanton mua”.
Vana tregon tutje se ishte emocionuar aq shumë sa që edhe sytë iu kishin mbushur me lot, pasi që kishte një kohë që gjatë që donte të shihte atë flamur aty ku shkollohet ajo dhe familja e saj.
Studentët e kanë uruar Vanën, duke qenë të njoftuar prej saj për kërkesën që kishte bërë dhe pritjen që kishte ta shihte flamurin e Kosovës.
Vana ka falënderuar Universitetin Shtetëror të Guvernatorëve që kanë realizuar kërkesën e saj, edhe pse ajo në data bazë është e regjistruar si studente amerikane shkaku i shtetësisë që ka atje.
Gjithashtu, ajo ka falënderuar të gjithë ata që kishin treguar mirëkuptim për kërkesën e saj.
“Jo gjithë kush ka mundur ta bëjë këtë pa pasur asnjë student në data bazë nga Kosova”, thotë Vana Jerliu Ramadani, me prejardhje nga Gjilani.
Burimi i lajmit: /Mediafokus.info
