Rrahmani ia siguron fitoren Napolit
Mbrojtësi i Kosovës shënoi në shtesë kundër Salernitanës, të kaltrit fitojnë me përmbysje.
Falë golit të Amir Rrahmanit në minutën e 96-të, Napoli mposhti me përmbysje Salernitanën 2-1 në takimin e javës së 20- të Serie A.
Të kaltrit i japin kështu një goditje krizës e shkojnë në 31 pikë në renditje. Në minutën e 29, stadiumi “Maradona” heshti pasi Kandreva kaloi Salernitanën në avantazh.
Në shtesën e pjesës së parë, Fazio i shkaktoi faull Simeones. Pas konsultimit me sistemin VAR, arbitri Marineli akordoi penallti.
Napoli, bashkë me Interin janë dy ekipet e Serie A që kanë marrë më shumë penallti në këtë sezon. Politano nga pika e bardhë e 11 metërshit nuk gaboi.
Në pjesën e dytë, napolitanët tentuan të thyenin murin e ngritur në prapavijë nga Salernitana. Rrjeta erdhi në shtesë nga mbrojtësi nga Kosova që i dha Napolit fitoren në derbi.
Rrahmani tregoi siguri në mbrojtje dhe u vlerësua nga sportmediaset me notën 7 për paraqitjen e tij.
