Dukagjini i fortë për Dritën, gjilanasit në krizë të thellë
Dukagjini ka arritur fitore të madhe ndaj Dritës me rezultat minimal 1-0.
Ka qenë një ndeshje shumë e fortë ku dy skuadrat kërkonin fitoren pasi vinin nga dy rezultate negative.
Gjithsesi pjesa e parë nuk solli gola duke përfunduar baras 0-0 me dy skuadrat që kishin disa raste shënimi.
E pjesa e dytë nisi më mirë për vendasit, kur Raddy Ovouka i mysafirëve shkaktoi penallti.
Ishte minuta e 58-të e ndeshjes kur mesfushori i vendasve Blerind Morina realizoi nga penalltia për 1-0.
Drita e gjitha ishte në sulm, duke kërkuar golin e barazimit.
Gjilanasit e arritën atë në minutën e 91-të me Albin Prapashticën, por që u anulua shkaku i lojës me dorë nga Blerim Krasniqi gjatë aksionit.
Deri në fund gola më nuk pati dhe Dukagjini mori tre pikë të mëdha.
Me këtë fitore klinasit ngritën në pozitën e pestë në tabelë me 17 pikë, derisa Drita mbetet e dyta me 22 sosh.
Ndeshjen e ardhshme Dukagjini e zhvillon në udhëtim te Ballkani, derisa Drita pret Fushë Kosovën.
Deklarata e Akis Vavalis:
Vavalis: Problemi më i madh është psikologjik
Drita ka pësuar humbjen e dytë radhazi dhe tani ka tre ndeshje pa fitore në Albi Mall Superligë. Gjilanasit janë mposhtur në udhëtim te Dukagjini i Klinës me rezultat minimal 1-0.
Trajneri i Dritës, Akis Vavalis ka thënë pas ndeshjes se pjesa e parë ishte më e mirë, derisa në të dytën nuk luajtën mirë shkaku edhe i fushës.
Tekniku grek tha se problemi më i madh i skuadrës së tij është psikologjik.
“Në pjesën e parë ishim më mirë. Kemi lëvizur topin. Është vështirë në këtë fushë. Është ndeshja e dytë që nuk shënojmë. Krijojmë por nuk shënojmë”.
“Ndaj Ballkanit kishim 6-7 raste, sot i kishim 5-6 raste. Ne po krijojmë dhe nuk po shënojmë. Duhet ta ndryshojmë këtë. Problemi më i madh është psikologjik. Kur të fillojmë të shënojmë do të jetë ndryshe”, ka thënë Vavalis.
Deklarata e Dallkut:
Goli i Blerind Morinës nga penalltia në minutën e 58-të të ndeshjes ishte vendimtar për tre pikët e skuadrës vendase.
Pas ndeshjes trajneri i klinasve, Armend Dallku ka përgëzuar lojtarët e tij për angazhimin dhe fitoren e arritur.
“Dukagjini nuk njihet për lojë individuale, por si grup. Jam i kënaqur që kanë pasur rastin të paraqiten 22 apo 23 futbollistë dhe sigurisht që edhe ata që nuk kanë luajtur shumë do ta kenë rastin të paraqiten në të ardhmen”.
“Jam i kënaqur me ecurinë dhe duhet të luftojë secili lojtar që do ta ketë mundësinë të vesh fanellën e Dukagjinit. I përgëzoj lojtarët, pasi me besim dhe guxim arritëm këtë fitore”.
“Kishim pak ditë për t’u përgatitur, por ia dolëm me sukses t’i mbyllim anët e tyre të forta. Kjo është forca e Dukagjinit dhe jam i kënaqur me këtë fitore”, ka thënë Dallku.
