Manifestimi Kulturor nga Ars Club “Beqir Musliu” – “Vjeshta Letrare e Gjilanit 2023”
Në mesin e katërmbëdhjetë librave të rinj, librin e Albina Idrizi për fëmijë, botuar nga Shtëpia Botuese “Rozafa”, e paraqiti Prof. Dr. Anton Nikë Berisha.
Vlerësim i veprës për fëmijë të Albina Idrizi, “Vogëlushi JE dhe plaku TA”.
Dorëshkrimi për fëmijë “Vogëlushi Je dhe plaku Ta” i shkrimtares Albina Idrizi dëshmon për një qasje mjaft të veçantë të moshës së fëmijërisë dhe të pleqërisë, ku shpërfillet koha dhe hapësira – “as e kaluar, as e ardhme”; përftohet një realitet që i shëmbëllen më shumë botës së ëndrrës dhe të përfytyrimit se sa botës konkrete.
Dy personazhet kryesore, vogëlushi Je dhe plaku Ta, takohen dhe kuvendojnë, ndërsa njëri “ngjitej qiellit dhe tjetri zbriste tokës”.
I pari sa ka nisur jetën, i dyti është në perëndim të saj; ata synojnë të afrohen e të njësohen me njëri – tjetrin dhe t’ia bartin tjetrit atë që i mungon: fëmija ngazëllimin dhe njomësinë, plaku mençurinë dhe përvojën.
Ky përafrim lidhet me faktin se, siç thuhet në tekstin e këtij dorëshkrimi: “në çdo plak është një fëmijë, dhe në çdo fëmijë është një plak”.
Në të vërtetë, urtia thotë se plaku bëhet edhe një herë fëmijë jo si ngjasim fizik, po mendor dhe shpirtëror; ka kërkesa dhe sjellje të fëmijës nga se e braktis fuqia, i zvogëlohet kujtesa, mprehtësia e mendjes, guximi etj. Megjithatë, në secilën moshë, bota dhe dukuritë vrojtohen në mënyrë të veçantë: i pari në perspektivë, i dyti mbështetet në mirëkuptim dhe në mirëbesim.
Vepra ka frymën e një lloj loje dhe argëtimi, po, në të njëjtën kohë shprehen mendime që janë të rëndësishme, sidomos për fëmijën që sa e nis shtegtimin jetësor. Pra, disa shprehje marrin cilësinë e fjalëve të urta ose të mendimeve të mëvetësishme.
Me qenë se fëmijët e sotit kanë mundësi të shumta për ta njohur botën dhe dukuritë e saj qysh në fillim të jetës së tyre, atëherë edhe mund t’i përfillin disa mendime e shprehje që në vështrim të parë nuk i përkasin natyrës që kanë ata.
Ilustrimet janë të një rrafshi të lartë dhe ia shtojnë vlerën librit.
Në vijim: – Fjala e plotë, e kritikut Anton Nikë Berisha, në hapje të Manifestimit “Vjeshta Letrare e Gjilanit 2023”
