Nga: Agron Gërguri: – Festivali i Teatrit Shqiptar në Maqedoninë e Veriut
Edicioni 22 | 24 – 30 shtator 2023 | Dibër
Përhershmëria e rëndësisë së Teatrit!
Për shtatë ditë-netë Dibra gostiti me mikëpritje artistët pjesëmarrës në edicionin e 22 të Festivalit të Teatrove në Maqedoninë e Veriut me pjesëmarrje të teatrove nga Kumanova, Shkupi, Prishtina, Tetova, Gostivari dhe Tirana, përfshirë këtu edhe shfaqjen përshëndetëse të Fakultetit të Arteve Dramatike nga Shkupi.
Shkruan: Agron Gërguri – dramaturg
Gara u përmbyëllë në atmosferë festive.
U panë shfaqje, u zhvilluan debate, lindën e u thelluan miqësi, u projektuan ide e mundësi bashkëpunimi për zhvillimin e artit teatror.
Në festivale temat e debatit hapen dhe trajtohen për të vërtetuar edhe një herë përhershmërinë e rëndësisë së teatrit dhe nevojës që kemi për t’i bërë publike ndjenjat tona, reagimin tonë emocional duke trajnuar e forcuar kriteret e vlerësimit për të argumentuar me dije e jo mbajtur qëndrime pozë apo formë pa përmbajtje, një kiç-hiç! Andaj na duhet Teatri si detektor i të vërtetës.
Festivali, debate miqësi e analiza.
Gjatë festivalit në Dibër në debatet konstruktive miqësisht të intonuara me Shemsi Dodën njohës i pasionuar i Teatrit, i cili e përcolli çdo shfaqje me kritikë qëllimmirë, analizat me Vjollcë Bekteshin, aktore brilante e cila gjithëherë kërkon diçka më tepër prej vetes, këtë herë në cilësinë e anëtares së jurisë duke ndier përgjegjësi të shtuar për kriteret e vlerësimit, komunikimin e shëndetshëm me doajenin e aktrimit Bislim Muçaj, i cili gjithëherë të “përlyen” me humor për të vërtetuar pastërtinë e mendimit, me një dashamirësi kritikuese, bisedat e nivelit me Suela Konjarin, e cila gjithëherë rrezanton me elegancë e vendosmëri, pedantëria gjuhësore e Naser Nuredinit, mbi të gjitha kujdesi i Ylberit me plotë njerëzillëk si dëshmi e përkushtimit mikëpritës përkundër obligimeve organizative për mbarëvajtjen e festivalit, të cilin e drejton me sukses, e plotë sakrifica, tash e 22 vjetë. S’ke se si mos t’i thuash bravo Ylber, Teatri si institucion elitar i kulturës po ndodhë në Dibër falë Ylber Nuredinit.
Yllka, të rinjtë vullnetarë dhe donatorët
Për çdo natë ishin aty edhe të rinjtë vullnetarë të festivalit të cilët kryenin punë organizative dhe i jepnin freski festivalit duke dëshmuar se janë e ardhmja e teatrit dibran. Këtë e dëshmon Yllka e cila sapo ka përfunduar Fakultetin e Arteve në Shkup, dega e aktrimit, klasa e Refet Abazit, profesor.
Mecenat dhe donatorët që e duan Teatrin
E po festivali nuk bëhet dot pa donatorë e sponzorë. Për shtatë netë të kaluara në hotel e restaurant “Cami”, deri në fund nuk e kuptuam se njëri ndër ata që me aq dashamirësi e respekt na shërbente ishte Ekuran Cami bashkë me bashkëshorten Rudina Pacuku – Cami, pronar të një biznesi hotelier që lidhej me turizmin kulturor, meqë resorti i tij ishte buzë liqenit të Dibrës, të cilin e përshkonte Rruga e Arbërit. Dhe kur e kuptuam se Ekurani e Rudina nuk janë puntorë por janë pronarë që po ndihmonin organizimin e festivalit me shumë përkushtim e thjeshtësi, respekti për ta u rritë në sytë e secilit prej nesh. Aferim Ekuran e Rudina, dhe të gjithëve që ndihmuan festivalin: Ministria e Kulturës e MV, Komuna e Dibrës, e të tjerë.
Festivali, aktivitetet përcjellëse dhe vlerësimi
Përveç shfaqjeve kishte edhe aktivitete tjera. Secili aktivitet përcjellës plotësonte kurreshtjen historike dhe argumentonte se festivali përveç pikëtakim me teatrot është edhe njohje e rinjohje e historisë.
Krejt në fund të festivalit juria: Vjollca Bekteshi-Hamiti, Bislim Muçaj dhe Suela Konjari, shpallën më të vlerësuarit në këtë festival: regjisorin Arben Kumbaro për regjinë e dramës “Armiku i popullit” e H. Ibsen, shfaqje e cila u vlerësua më e mirë e festivalit> Nga kjo shfaqje me çmime u vlerësuan edhe aktori Arsim Fazlija për rol protagonist dhe aktorja Sheqerije Ilazi për rol dytësorë. Këtë sukses të Teatrit të Tetovës drejtori Bekim Smaili e festoj me të gjithë pjesëmarrësit e natës finale.
Ndërsa çmimet tjera, juria ia ndau Teatrit Shqiptar të Shkupit. U vlerësuan aktorët: Sara Bajrami për rolin kryesor dhe Abedin Alimi për rol dytësor në shfaqjen ADN, në regji të Fatos Berishës.
Festivali përfundoi me thirrjen e të gjithë pjesëmarrësve për kompetentët e kulturës që Festivali të Institucionalizohet, të cilën thirrje e mori me dashamirësi Hekuran Duka, kryetar i komunës së Dibrës, i cili e mbylli festivalin me premtimin se do angazhohet që festivali të vazhdoj.
Mbresë e mungesë!
Mungesa e Josif Papagjonit, Nebi Islamit, Miho Gjinit, të cilët i kishin dhënë peshë festivalit gjatë viteve, u evidentua te thuaja të gjithë, kishin respekt falënderues për gjithë çka i kanë dhënë festivalit në rritën e tij 22-vjeçare.
Mirupafshim në edicionin e 23!
