Spitali i Përgjithshëm në Gjilan paralajmëron projektin investiv modern me infrastrukturë bashkëkohore
Në Spitalin e Përgjithshëm Gjilan po realizohet projekti më i madh investiv deri më tani, investimet kapitale në infrastruktur dhe pajisje mjekësore moderne tani më do të bëhen realitet.
Lajmin e ka bërë të ditur faqja zyrtare e këtij institucioni të shëndetësisë, ndërsa ka njoftuar se projekti tanimë ka filluar.
“Me këtë rast njoftojmë pacientët dhe personelin se faza e parë e projektit sapo ka filluar. Ky projekt milionësh i paralajmruar edhe me herët do të realizohet për qytetarët e Anamoravës, Kosovës Lindore dhe qytetarëve nga zona kufitare e Kumanovës”, thuhet në njoftimin e publikuar në faqe të Spitalit.
Sipas njoftimit bëhet e ditur se të mërkurën aty ka qëndruar një delegacion nga LuxDev, me të cilin janë diskutuar hapat e mëtejmë.
“Në ambientet e spitalit sot pritëm në vizitë pune përfaqësuesit nga LuxDev z. Philippe Pire dhe znj. Saranda Sadiku, si dhe përfaqësuesin e kompanisë projektuese “Patria”, z. Baton Arifi me të cilët u bisedua për përgatitjet finale për fillimin e punëve dizajnuese si fazë paraprake e fillimit të punimeve në renovimin e objektit kryesor spitalor nr 1”, thuhet në njoftim.
“U pajtuam që, për të ecur punët mbarë, nga ana e spitalit duhet të formojmë një ekip ndërlidhës me qëllim të koordinimit të veprimeve me ekipin projektues të kompanisë “Patria”, dhe me ekipin e arkitektëve të angazhuar nga LuxDev, z. Charis Savvides dhe Philippe Pire”, thuhet më tej.
Sipas njoftimit, investimet në infrastrukturë, angazhimi i kuadrove të reja mjekësore dhe mbështetëse si dhe ngritja e disiplinës në punë janë synimet parësore të këtij institucioni të shëndetësisë, për shërbime cilësore dhe të sigurta për të gjithë qytetarët e rajonit të Anamoravës dhe më gjerë.
“…Shfrytëzojmë rastin që krahas prezentimit të arritjeve tona si Spital, t‘i falënderojmë përzemërsisht gjithë ekipin e Projektit KSV/017, Agjensionin LuxDev, Qeverinë e Luxemburgut dhe popullin e Luxemburgut, me përkrahjen e të cilëve ne po përmirësojmë shërbimet për pacientët tanë!”, përfundon njoftimi.
