Gjilan: Ndërron jetë veprimtari Sejdullah Kadriu

Ndërron jetë veprimtari Sejdullah Kadriu!

Njoftimin e kobshëm për ndarjen nga jeta të veprimtarit Sejdullah Kadriu, e ka bërë familja e tij përmes rrjeteve sociale.

Në njoftim mes tjerash thuhet: “Me dhimbje të thellë ju njoftojmë se babai ynë i dashur Sejdulla Kadriu ka ndërruar jetë. Ky është një moment i trishtë për ne dhe familjen tonë. Varrimi bëhet me datën, 6.09.2023, (E mërkurë), me drekë në Varrezat e Gjilanit. Me Respekt Familja Kadriu!”

Veprimtari i shquar i çështjes Kombëtare e aktivisti i dalluar i shumë nismave, Sejdullah Kadriu, jetoi e punoi në Gjilan ndër vite, ndërsa vinte me origjinë nga Malësia e Bujanocit.

Me rastin e vdekjes së tij kanë reaguar shumë bashkëvendës e veprimtar sikurse edhe aktivistë tjerë e bashkëmoshatarë të të ndjerit.

Reagime të ndryshme:

Në profilin e tij Mehmetali Rexhepi Shkruan:

IN MEMORIAM

SEJDULLA KADRIU (1957-2023)

Një njeri nga më të mirët e racës njerëzore paska ikur nga kjo botë, shoku ynë çdo herë i dashur Sejdullah Kadriu!…

I ndjeri Sejdullah Kadriu kurrë nuk iu nda të mirës dhe dashurisë për atdheun… Dhimbja nga dhuna e armikut asnjëherë nuk e la të qetë por, Sejdullahu e përballoi në çdo mes, si në mjedisin familjarë, ashtu edhe mes shokësh e miqsh pa iu nënshtruar sëmundjes… Gjithnjë kemi pasur kënaqësi të ishim me të, sepse të tërhiqte qetësia e urtësia e tij, modestia dhe afria njerëzore.

Veprimtarë e njerëz të tillë iu deshën atdheut e kombit tonë dhe, prore paçim modele të tillë idealistësh, sikurse Sejdullah Kadriu! Mbetsh fanarë i përhershëm ndriçues o shoku e miku ynë i çmuar! Lavdi për sakrificat tua!

Kolegu i të ndjerit Sejdullah kadriu, drejtori i shkollës “Musa Zajmi”, Ramadan Dërmaku, ka reagua duke bashkëndjerë për vdekjen e të ndjerit Kadriu.

Reagimi i Avdyl Ibishi nga Malësia e Bujanocit

Reagimi i Ardian Azemi, aktivist i degës së AAK-së në Gjilan:

“Një jetë kushtuar çështjes kombëtare, i sfiduar vazhdimisht e me shumë vuajtje, Sejdulla Kadriu arriti me e kry me sukses detyren ndaj atdheut. Sot ai qenka ndarë nga jeta, e ky është një lajm i trishtë për ne si qytetarë, për kolegët e tij dhe shokët e idealit. Ishte një qytetar i sjellshëm, i urtë, aktiv shumë edhe në liri. Të tillë do ta kujtojmë! Ngushëllime familjes Kadriu dhe gjithë atyre që e njohën e bashkëvepruan në secilën rrethanë! U prehsh në paqe njeri i mirë!”