U thumbua nga Daja, lajmërohet Munishi – tifozët e “bombardojnë” me komente
Ismet Munishi është lajmëruar me një koment pas fitores së Ballkanit ndaj Bate Borisov në ndeshjen e parë të play off-it të Ligës së Konferencës.
Pasi kishte kritikuar ashpër Ballkanin për disfatën ndaj Ludogorets rreth një muaj më parë, të cilës pretendohet t’i jetë referuar sot trajneri Ilir Daja në një deklaratë pas sfidës së sotme ku thumboi specialistët e futbollit, Munishi sot ka përgëzuar suharekasit.
”Bravo”, ka shkruar shkurtimisht tekniku i Ferizajit në Facebook.
Por, lajmërimi i tij ka ngjallur reagime të shumta nga tifozët e futbollit në Kosovë. Ata e kanë “bombarduar” trajnerin me komente. Disa nuk kanë ngurruar t’ia rikthejnë komentet e tij kritikuese për humbjen e Ballkanit në xhiron e parë kualifikuese të Ligës së Kampionëve.
“Boll inati pot vjen veq nejse, Respekt”, i ka shkruar një komentues.
“Të kanë rëndu sante i madh i vogel. A ki naj fjal me ju thanë”, i ka shkruar një tjetër tifoz, Munishit.
Ballkani e mposhti mbrëmjen e sotme BATE Borisov me rezultatin 4-1.
Në lidhje me këtë sukses foli edhe trajneri Daja, që në prononcimin pas ndeshjes për mikrofonin e “Supersport” u dërgoi një mesazh edhe analistëve.
“Mos mu bëj si disa specialistë në Kosovë, që kujtojnë vetëm humbjen ndaj Ludogorets”, tha Daja.
E më pas Munishi sërish është paraqitur me një apel publik: “Pas një Zot mos i merrni baksuzat edhe defat në Hungari”, ka shkruar ai, duke sygjeruar me skepsë pesimiste se akoma është herët t’i gëzohen kualifikimit në fazën e grupeve në Konferencë League.
