Etno Fest edicioni i XIII-të – Liria,
Etno Fest edicioni i XIII-të – Liria.
Nata e shtatë, 19 gusht 2023
Gjatë ditës së shtatë, në Etno Fest, u shijuan hapësirat e mbushura me piktura, skulptura e mozaikë të ndryshëm.
Programi i mbrëmshëm filloi me tryezën e diskutimit, me temë: Muzika tradicionale si gjetje artistike në krijimin e operës, fillet e operës shqiptare, muzika artistike shqiptare e bazuar e bazuar në muzikën burimore, zhvillimi dhe pengesat në karrierën e artistëve shqipëtarë. Pjesëmarrësit e ftuar në diskutim ishin: Prof. Nikolin Gurakuqi, Prof. Ahmet Dërguti, Prof. Besa Berberi, Prof. Rreze Kryeziu si dhe Prof. Behar Arllati.
Pas tryezës së diskutimit, hapsira e teatrit u mbush me artdashës të cilët e ndoqën programin vijues, programi “SOURCE” nga aktori Avni Dalipi, me përcjellje muzikore Avni Krasniqi nga grupi “No Name”. Poezitë pjesëmarrëse ishin: “Grue” nga autorja Vlora Ademi, “Mos u dorëzo kurrë çika jem” nga autorja Donika Dabishevci, “Faleminderit e dashur” nga autori Fadil Bajraj, “Faleminderit të gjithë atyre që më kanë dashur” nga autorja Maram Al Masri, “Në fushëbetejë shtratin kam me e kthy” nga autorja Donika Dabishevci, “Ai i ka dy gra” nga autorja Maram Al Masri, “Deshta të hyj në zemrën tënde” nga autori Ndoc Gjetja, “Më fal atdheu im” nga autori David Boseta, “Kur iki nga vendlindja” nga autori Sergej Jesenin dhe “Me puthje dua frymën të ma marrësh” nga autori David Boseta. Poezitë u intërpretuan nga aktorët Avni Dalipi, Labinot Lajçi dhe Vedat Haxhiislami. Poezi të thurura shumë bukur nga autorët, me mesazh shumë të fuqishëm e me një fjalor të pasur. Poezitë u recituan nga aktorët plot jetë.
Opera “Lo Speziale” nga Joseph Haydn bashkpunimi me Opera e Kosovës & Universiteti i Prishtinës – Fakulteti i Arteve/ Dega e Artit Muzikor dhe nga regjisorja Elikona Hysaj Shala, u shfaq para publikut në hapsirën e hapur të Etno kompleksit. Me një libreto magjepsëse nga Carlo Goldoni, opera ofron një skenar argëtues të mbushur me dashuri dhe humor mes katër personazheve kryesore.
Përsonazhet kryesore: Sempronio – Harris Bajraktari (bariton), Grilletta – Aurela Krasniqi (soprano), Mengone – Rizah Jahaj (tenor), Volpino – Dija Sadiku (mexosoprano) si dhe Harpsikord – Eranda Meka.
Shfaqja operistike “Lo Speziale” u përcoll me të qeshura nga publiku me komedine e lehtë që e mbart në vete.
Në hapsirën e stërmbushur të Etno nejës, Edona Reshitaj & Band, përfunduan natën me muzikë argëtuese, të cilët udhëtuan ndër vite e ndër kombe me muzikën e mahnitshme. Edona Reshitaj & Band, sollën para publikut një energji dhe atmosferë të jashtëzakonshme.
Etno Fest vazhdon programin edhe për tri ditë të tjera, duke ngritur tema që synojnë lirinë e lavdishme.
Ndihuni të lirë me ardhë! Etno Fest ju pret me zemër edhe me duar të hapura!
Fotografitë nga Fikret Ahmeti
