Preshevë: Aktorja Egzona Salihu thotë se e larguan për inate politike, drejtori Sadriu kundërpërgjigjet: Nuk respektoi kodin e punës
Aktorja Egzona Salihu është larguar nga puna në Shtëpinë e Kulturës në Preshevë, me arsyetimin se nuk respektoi orarin e punës.
Salihu, kishte pranuar të punësohet formalisht si ndriçuese, në mënyrë që t’i mundësohet aktrimi atje, meqë Serbia nuk ia njihte diplomën e Universitetit të Prishtinës.
Salihu për media ka thënë se arsyeja e vërtetë e largimit ka qenë për inate personale politike, duke shtuar se “nga emërimi i Kujtim Sadriut në postin e drejtorit në Shtëpinë e Kulturës në Preshevë është përballur me padrejtësi.”
“Po me kanë larguar me arsyetimin e mos respektimit të orarit. Datat të cilat janë përdorur në atë vendim kam arsyetim po këto janë përdorur vetëm për ta kryer qëllimin e tij që ka qenë gjithmonë largimi im nga puna. Arsyeja e vërtet e largimit ka qenë inate personale politike sepse unë përballem me probleme dhe padrejtësi me shumë se një vit që nga emërimi i këtij drejtori“, u shpreh Salihu.
Ajo tha se do t’i ndjekë hapat ligjor për këtë vendim të drejtorit Sadriu.
Deklaratës së aktores iu kundërpërgjigj drejtori i Shtëpisë së Kulturës, Kujtim Sadriu.
Sadriu ka deklaruar në faqen e tij në facebook se arsyeja e vetme e largimit është mosrespektimi i orarit.
“Ndërprerja e kontratës nuk ka të bëjë absolutisht me politikë. Nga puna është larguar për arsye të mos respektimit të kodit të punës dhe sjelljeve që ka pasur”, ka thënë ai.
Vlen të theksohet se Egzona Salihu është e punësuar nga pushteti i Shqiprim Arifit, tre vjet më parë“, ka thënë ai në një deklaratë për media.
Kujtojmë që Sadriu edhe kohë më parë në rrjete sociale ka paralajmëruar, madje me “zë kritik” se punëtorët e shtëpisë së Kulturës “Abdullah Krashnica” në Preshevë, e rrjedhimisht edhe ata të Teatrit të Preshevës, i themeluar vite më parë – nëntor 2017, duhet të punojnë me orar të plotë në institucionin ku paguhen sipas kontratës së rregullt!
