Rikthehet vala e të nxehtit, ja kur pritet destabilizim i motit dhe ulje e temperaturave
Ndonëse mesi i javës së kaluar solli edhe sado pak freskim të motit në të gjithë vendin, kjo javë sjellë sërish vapën e nxehtë afrikane.
Pra, gjatë kësaj jave vendi ynë do të mbetet kryesisht nën ndikimin e kushteve të qëndrueshme dhe të masave të nxehta ajrore me origjinë Afrika Veriore.
Nën këto kushte, nga dita e sotme deri të Premten, moti do të karakterizohet me diell dhe vranësira të pakta, të cilat më shtuara parashihet të jenë sot dhe të Mërkurën, me mundësi për ndonjë reshje të izoluar.
Nga dita e Shtunë parashihet të depërtojnë masat e ftohta nga perëndimi i kontinentit, duke sjellur destabilizim të fuqishëm të motit.
Fillimisht moti do të karakterizohet me diell dhe vranësira, të cilat gjatë ditës pritet të pasohen nga një sistem i fuqishëm frontal, duke sjellur rrebeshe lokale shiu, breshër, erëra mjaft të fuqishme dhe shkarkesa të forta elektrike. Njëkohësisht, edhe temperaturat do të pësojnë ulje të theksueshme.
Dita e Dielë do të mbetet nën ndikimin e masave të ftohta, duke u karakterizuar me diell e vranësira, e lokalisht edhe me rrebeshe shiu.
Era do të fryjë drejtimesh të ndryshme, e cila kohë pas kohe pritet të jetë mjaft e fuqishme, e sidomos në fundjavë, me shpejtësi prej 15-70 km/h!
Temperaturat nga dita e Hënë e deri të Premten do të shënojnë ngritje nga dita në ditë, ndërsa në fundjavë pësojnë ulje, më e ndjeshme të Dielën. Minimalet do të luhaten prej 11 deri në 20°C, ndërsa ato maksimale prej 20 deri në 36°C.
Burimi: /MeteoKosova/
