Përveç komunës, edhe FFK mbështet turnirin tradicional “Rogana 2023”, nikoqiri paralajmëron çmime rekorde për më të mirët
Kur kanë mbetur fare pak ditë deri te fillimi i turneut më unik në futboll të vogël, “Rogana 2023”, jehona e të cilit është përhapur gjithndej trojeve etnike, orgnizatorët nikoqirë, si zakonisht edhe këtë herë, duan të sjerllin risi, për ta bërë akoma më joshës atë.
Shih për këtë, ata, organizatorët, janë mobilizuar që asgjë mos t’i ngelet rastësisë, por të parashikojnë me një skenar të përpiktë rrjedhën e tërësishme të turneut, duke filluar nga hapësira kohore për paraqitjen e ekipeve, mënyra organizative, strategjia e avancuar e fushatës paralajmëruese në faqen e saj zyrtare “Turneu Tradicional – Rogana”, si dhe një sërë detajesh tjera që pritet të bëhen të ditura në vijim. Sot, disa ditë para hapjes zyrtare, faqja “Turneu Tradicional – Rogana” ka njoftuar për mbështetjen që ka gjetur te Federata e Futbollit të Kosovës, gjegjësisht kreu i saj Agim Ademi.
“Çmime rekorde për këtë vit, e bashkëpunime me profesionistë. Turniri Tradicional i Futbollit të Vogël “Rogana 2023”, edhe këtë vit përkrahet nga organet më të larta udhëheqëse, Komuna e Kamenicës, dhe njëherit nga organi më i lartë i futbollit në Kosovë, Federata e Futbollit e Kosovës”, thuhet në njoftim.
Poashtu organizatori ka falënderuar ata që e kanë mbështetur.
“Falënderojmë kryetarin e komunës së Kamenicës, z. Kadri Rahimaj, e gjithashtu kryetarin e FFK-së, z. Agim Ademi, për përkrahjen e pakursyer ndaj këtij eventi sportiv”, thuhet më tej në njoftim.
Se si do të rrjedhë ky turnir mbetet të shihet në vijim, përgjatë rrjedhës së tij njëmujore, pasi si i tillë, turniri ka ndërtuar strukturen organizative, me pjesëmarrje standarde e strikte të ekipeve, gjithësej 32 sosh, si dhe shpërndarjen e tyre në 8 grupe me nga 4 skuadra në fazën e parë, për të vijuar më pas me fazën e dytë, atë të eliminimit direkt.
Ajo që e bënë të veçantë këtë turnir, edhe këtë herë pritet të jetë pikërisht pjesëmarrja masive e shikuesve, marrë parasysh edhe faktin se korrespodon me periudhën e pushimeve në vendlindje të mërgimtarëve.
