Vazhdon tradita artistike e trekëndëshit Prishtinë-Tiranë – Tetovë
Fakulteti i Arteve në Prishtinë, përmes një njoftimi në faqen zyrtare në rrjete sociale ka bërë të ditur se edhe këtë vit do të mbahet takimi i përbashkët i tri institucioneve respektabile akademike, gjegjësisht edicioni i 13-të i manifestimit të përbashkët “Ura me tri harqe” që mbledhë e prezanton punën krijuese të studentëve të tri institucioneve akademike, të trekëndëshit mbarëshqiptar, Prishtinë-Tiranë-Tetovë.
“Kemi kënaqësinë t’iu njoftojmë se Fakulteti i Arteve do të jetë nikoqir i edicionit të trembëdhjetë të ngjarjes së përbashkët kulturore, “Ura me tri harqe”, e të tri institucioneve shqipfolëse të arsimit të lartë: Universiteti i Arteve – Tiranë, Fakulteti i Arteve i Universitetit të Tetovës si dhe Fakulteti i Arteve i Universitetit të Prishtinës”, thuhet në njoftim.
Sipas nikoqirit organizator, Fakultetit të Arteve të prishtinës, ky manifestim, për dy ditë me radhë do të shfaqë, ekspozojë e performojë, projektet artistike më me vlerë përgjatë vitit akademik 2022-23, si filma me metrazh të shkurtër, dokumentarë, shfaqje teatrale, ekspozitën e koncertin e përbashkët të tri Universiteteve”, thuhet veç tjerash në njoftimin zyrtar.
Poashtu bëhet e ditur se këtë vit ky aktivitet i veçantë për nga struktura e tradita, do të sjellë risi, pasi manifestimi “Ura me tri harqe”, do të sjellë edhe një shfaqje mysafire nga studentët e Fakultetit të Arteve Dramatike në Shkup, thuhet në njoftimin e Fakultetit të Arteve në Prishtinë.
