Emërimi i trajnerit grek te Drita bëhet lajm edhe në Greqi: Vavalis ka mision titullin e kampionit në Kosovë
Emërimi i trajnerit grek, Akis Vavalis në krye të shtabit teknik te Drita është bërë lajm edhe në mediat greke.
Vavalis është prezantuar të hënën (dje) në ambientet e stadiumit ndihmës në Gjilan nga drejtori sportiv i Dritës, Valon Zymberi.
37-vjeçari ka marrë drejtimin e tre herë kampionëve të Kosovës kur kanë mbetur edhe gjashtë xhiro deri në fund të kampionatit, dhe po e zëvendëson Arsim Thaqin që dha dorëheqje papritur pak ditë më parë.
Mediumi grek “sport24.gr” ka raportuar për emërimin e trajnerit grek te klubi i Superligës së Kosovës. Gazeta ka shkruar për synimin e Vavalis për t’u shpallur kampion i Kosovës me Dritën e Gjilanit.
“Akis Vavalis ka marrë drejtimin e Dritës në Kosovë me synimin për të fituar titullin në gjashtë ndeshjet e fundit. Përpjekja e Dritës për të fituar kampionatin e sivjetmë në Kosovë u bë mision i Akis Vavalis, i cili e mori drejtimin teknik gjashtë ndeshje para fundit” – thuhet në artikullin e mediumit grek.
Drita pas 30 ndeshjeve këtë edicion në elitën e futbollit kosovar ka 60 pikë në pozitën e dytë, vetëm një më pak se Ballkani, skuadra rivale në garë për titull të kampionit.
“Intelektualët” kanë synim të vetëm të stolisen me titullin e katërt në histori të klubit.
