Mërgimtari nga Franca solidarizohet me familje skamnore
Humanizmi e solidariteti i popullit tonë e individëve të shumtë gjithandej nuk ka munguar asnjëherë përgjatë rrjedhës së kohës, si në Gjilan e Anamoravë ashtu edhe ne mbarë trevat shqiptare. Porse ai është më i theksuar veçmas në data e ditë të shunuara, siç janë festat fetare e kombëtare, por edhe raste tjera.
Njëri nga këta individë është Hajrush Azemi nga Gjilani, që jeton e vepron në Francë prej kohësh, i cili ka ndihmuar 15 familje me artikuj ushqimore, mjete financiare, pajisje higjienike e veshëmbathje dhe pako ushqimore në muajin e shenjtë të Ramazanit.
Këtë nismë humane e solidare e kanë përkrahur edhe ndërmarrje tjera biznesore e individë të ndryshëm, tha organizatori Ardian Foniqi.
“Këtij akti e kësaj nisme i është bashkuar edhe ndërmarrja biznesore “Antika”, e cila është solidarizuar duke ndihmuar një numër të konsiderueshëm familjesh në nevojë. Nismës së Hajrush Azemit i janë bashkuar edhe Alush Veliu, Nexhmedin Saqipi, si dhe mishtorja “Gjini”, shtoi Foniqi.
Sipas Foniqit, gjatë shpërndarjes së ndihmave ekipi ka hasur në familje që vërtetë kanë nevojë t’u shtrihet dora e ndihmes dhe solidaritetit. Ai ka theksuar enkas per TV Gjilani se ka edhe të tilla familje që jetojnë në kushte skajshmërisht të vështirë, pa objekte adekuate banimi.
“Njëra nga to është familja Sahiti e cila ka nevojë urgjente për t’iu mundësuar një kulm mbi kokë, pasi jeton në kushte skajshmërisht të vështira. Ndaj dora solidare e atyre që kanë mundësi ta ndihmojnë këtë familje në mënyra të ndryshme, do të ishte akt më se human, dhe vepër solidariteti”, tha Foniqi, duke saktësuar se aktet humanitare të bashkëthdetari hajrush Azemi nga Zarbinca e komunës së Bujanocit, me vendbanim në Gjilan e me punë të përkoshme ne Francë, do të vazhdojnë edhe në të ardhmen, kudo e kurdo që paraqitet nevoja./Tv Gjilani/
