Dukagjini feston në “Fadil Vokrri”, Ferizaji e Llapi fitojnë në shtëpi
9 prill, 2023 – Sot janë zhvilluar tri ndeshjet e tjera të javës së 28-të në AlbiMall Superligën e Kosovës në futboll. Dukagjini ka shënuar fitore si mysafir në stadiumin “Fadil Vokrri” në duel me Prishtinën, me rezultat 2:1, duke i dhënë fund serisë pozitive të kryeqytetasve.
Mysafirët nga Klina kaluan në epërsi pas vetëm nëntë minutash, kur Muhamed Useini shënoi autogol duke e devijuar topin pas gjuajtjes së Blerind Morinës.
Shifrat i barazoi Mërgim Pefqeli, në minutën e 26-të, por epërsinë e Dukagjinit e riktheu Altin Merlaku, në minutën e 59-të, që doli të jetë edhe goli i fitores. Tani Prishtina dhe Dukagjini kanë kuotë të barabartë pikësh (38) dhe renditen në pozitat 5 dhe 6.
Ndërkohë, në dy ndeshjet e tjera fitoreve iu gëzuan skuadrat vendase. Ferizaj e mundi Gjilanin (2:0), me golat e shënuar nga Gentrit Halili (30’) dhe Gentri Ramusa (53’), duke u ngjitur në pozitën e shtatë, me 31 pikë.
Në anën tjetër, Llapi u tregua tejet efikas në duel me Drenicën, duke e mundur me shifrat 4:0, me golat e shënuar nga Gerhard Progni (6’), Alef Firmino (44’), Festim Alidema (81’) dhe Albion Kurtaj (85’). Me këtë fitore, Llapi arrin në kuotën e 39 pikëve dhe ngjitet në pozitën e katërt, ndërsa Drenica mbetet e fundit me vetëm 23 pikë të mbledhura dhe me shpresa gjithnjë më të vogla për mbetje në elitë.
