Valverde e priti në parking dhe e sulmoi me grusht Baenan, publikohet video me fytyrën e fryrë të yllit të Villarrealit
Ndeshja mes Real Madridit dhe Villarrealit pati një pas-ndeshje të ethshme, me një sherr mes Federico Valverde dhe Alex Baena, në parkingun e autobusëve.
Real Madridi u mposht me rikthim në Santiago Bernabeu nga Villarreali me rezultat 3-2 në ndeshjen e vlefshme për javën e 28-të në La Liga.
Kjo humbje e minutave të fundit dhe rikthimi nuk i ka pëlqyer aspak mesfushorit uruguaian, Valverde, i cili ka shpërthyer pas ndeshjes.
Valverde ka bërë ‘sherr’ me sulmuesin anësor spanjoll, Baena, pasi edhe në të kaluarën kanë pasur disa përplasje mes vete në ndeshjet e ndërsjella.
Një shkak tjetër thuhet të jenë edhe disa komente të yllit të Villarrealit në lidhje me problemet e gruas së Valverdes rreth një aborti.
Sipas mediave spanjolle, Valverde i nervozuar me Baenan, e ka pritur këtë të fundit në zonën ku janë parkuar autobusët e ekipit vizitor.
Mediumi El Chiringuito, por edhe Marca kanë konfirmuar konfrontimin, ku thuhet se ylli i Real Madridit e ka goditur me grusht në fytyrë Baenan.
Sulmi i Valverdes i ka zënë në befasi lojtarët e Villarrealit, të cilët në atë kohë festonin tre pikët që i mbajnë gjallë shpresën në luftën për një vend në Ligën e Kampionëve.
Villarreali ka një rekord grafik të asaj që ndodhi dhe lojtari po mendon të shkojë në një stacion policie për të raportuar faktet dhe sulmin që ka pësuar nga Valverde.
El Chiringuito më vonë ka publikuar disa pamje ku Baena shihet me fytyrë të fryrë pasi u godit nga valverde në Santiago Bernabeu. Kjo video është regjistruar nga gazetari Pablo Patino.
