Quni i LDK-së: Strategjia për Sigurinë është hartuar me “copy-paste” nga interneti
Deputeti i LDK-së, Anton Quni ka thënë se Strategjia e Sigurisë së Kosovës për vitin 2022-2027, është bërë në formatin “copy-paste”.
Anton Quni, deputet i LDK-së
Ai në seacën e Kuvendit ku po shqyrtohet kjo strategji tha se me hartimin e saj është marrë vetëm një njeri, i cili sipas deputetit Quni ka punuar me metodën “copy-paste” nga interneti.
“E kam kuptu që me hartimin e strategjisë është marrë vetëm një njeri, një person, i cili nën presionin e kohës dhe përvojës së vogël për punë ekipore e ka kompletuar dokumentin duke bërë ‘copy-paste’ të paragrafëve të strategjive të shteteve të Ballkanit. Po më vjen inati me e thënë këtë”, tha Quni.
Paraprakisht, Quni tha se ky rast ia kujtoi një mik të tij, i cili në një ministri harton strategji me metodën ‘copy-paste’.
“Mu kujtua një ngjarje me një mik timin. Ai punon në një ministri dhe unë e pyeta çka punon konkretisht. Unë – tha – në ministri jam strateg. Thash, shpjegoma pak. Po tha, kur më takon ministri në korridor, më thotë ma bëj strategjinë për filan temën, unë i hyj internetit copy-paste, i marr do paragrafe, ia kompletoj një dokument, ia dorëzoj dhe ai fascinohet. Mendon që jam strategu më i mirë në ministri, mendon që jam gjenial. Z. kryeministër, më besoni, në këtë frymë është punuar kjo strategji”, tha ai.
