71 banesa për 71 familje – Banimi i Përballueshëm dhe Social po jetësohet edhe në Gjilan
71 banesa për 71 familje, në një sipërfaqe të përgjithshme prej 12,350 metrash katrorë, për kushte të denja jetese dhe banim të qëndrueshëm.
Sot, Kryeministri, Albin Kurti, bashkë me Kryetarin e Gjilanit, Alban Hyseni, ministren e Ekonomisë, Artane Rizvanolli, dhe zëvendësministrin e MPHI-së, Jeton Raka, vunë gurthemelin e këtij projekti në Gjilan.
“Pas Istogut javën e kaluar, sot ishim në Gjilan, ku vendosëm gurthemelin e Kompleksit të Banimit të Përballueshëm dhe Social. Nga 71 banesat që do të ndërtohen, 57 do të jenë për banim të përballueshëm dhe 14 për banim social,” ka deklaruar Kryeministri Albin Kurti.
“Banesat do të jenë të katër llojeve: me sipërfaqe prej 53, 66, 77 dhe 87 metrash katrorë. Përfitues do të jenë çiftet e reja, ku mosha e njërës palë në çift duhet të jetë nën 37 vjeç, si dhe familjet me një prind vetushqyes.”
“Trekëndëshi: ministri dhe komuna në njërën anë, Instituti për Studime të Banimit në anën tjetër, dhe gjithashtu Korporata Ndërkombëtare Financiare, ka funksionuar në mënyrë efikase për të ardhur deri te kjo ditë që sjell lajm të mirë për të gjithë qytetarët e Gjilanit, për Komunën e Gjilanit dhe në veçanti për ato familje që do të banojnë këtu,” ka thënë Kryeministri Kurti.
