18 minatorë mbeten ende në zgafellë pas defektit teknik në Trepçë
Një defekt teknik në minierën e Trepça ka lënë të bllokuar disa minatorë në nëntokë për më shumë se 16 orë, raportojnë mediat lokale duke iu referuar deklarimeve të përfaqësuesve sindikalë dhe zyrtarëve të kompanisë.
Sipas informacioneve të bëra publike për media, problemi kishte ndodhur gjatë orëve të para të mëngjesit, pasi një trafo kryesore kishte pësuar prishje, duke shkaktuar ndërprerje të funksionimit në minierë.
Në momentin e incidentit, në ndërrimin e tretë thuhet se ndodheshin rreth 45 minatorë. Një pjesë e tyre kishin arritur të dilnin në sipërfaqe në këmbë, përmes rrugëve alternative dhe të vështira brenda minierës.
Megjithatë, sipas deklarimeve të dhëna për media, 18 minatorë kishin mbetur ende në horizontet e 10-të dhe 11-të të zgafellës, pasi për shkak të moshës dhe gjendjes fizike nuk kishin mundur të përdornin të njëjtat rrugë daljeje si kolegët e tyre.
Përfaqësues të lidhur me minierën kanë bërë të ditur se ekipet teknike kishin punuar gjatë gjithë kohës për sanimin e defektit dhe rikthimin e energjisë elektrike, me qëllim nxjerrjen sa më të shpejtë të minatorëve të mbetur nën tokë.
Sipas raportimeve, gjendja e tyre ishte cilësuar si jo e lehtë pas shumë orësh të kaluara në zgafellë, ndërsa punimet për riparimin e trafos kishin vazhduar pa ndërprerje.
