Universiteti “Kadri Zeka” prezanton programet studimore para maturantëve të Gjilanit

Universiteti Publik “Kadri Zeka” në Gjilan organizoi sot një aktivitet promovues për të informuar dhe orientuar maturantët lidhur me programet studimore që ofron.

Qëllimi i aktivitetit ishte të ndihmojë të rinjtë në zgjedhjen e drejtimit të studimeve, duke i njoftuar me mundësitë akademike, mobilitetin studentor dhe perspektivat e punësimit pas diplomimit.

Gjatë promovimit, përfaqësues të fakulteteve prezantuan ofertën akademike:

– Fakulteti i Edukimit:

Profesoresha Shqipe Avdiu-Kryeziu prezantoi programet që përgatisin mësimdhënës dhe profesionistë të edukimit me standarde bashkëkohore.

– Fakulteti Ekonomik:

Dekani Xhevat Sopi foli për përgatitjen e studentëve në fushat e biznesit, menaxhmentit dhe ekonomisë moderne.

– Fakulteti i Shkencave Kompjuterike

Dekanja Afërdita Ibrahimi prezantoi njohuritë e avancuara në teknologji dhe inovacion digjital.

– Fakulteti i Shkencave Aplikative

Dekani Xhevdet Thaqi tregoi për përgatitjen teorike dhe praktike për tregun modern të punës.

– Fakulteti i Shkencave Sociale:

Prodekani Blerim Haziri prezantoi studimet mbi shoqërinë, institucionet dhe proceset sociale bashkëkohore.

Alumni Erleta Halimi ndau me maturantët përvojën e saj studentore, akademike dhe profesionale si shembull frymëzues.

Betim Berisha, u.d. i Udhëheqësit të Zyrës për Bashkëpunim Ndërkombëtar, prezantoi marrëveshjet me universitetet evropiane dhe mundësitë e mobilitetit studentor.

Arlinda Selmani, u.d. e Udhëheqëses së Divizionit për Karrierë dhe Alumni, foli për mbështetjen që universiteti ofron për zhvillim personal dhe punësim pas diplomimit.

UKZ inkurajoi maturantët të shfrytëzojnë këto informacione për të ndërtuar të ardhmen e tyre akademike dhe profesionale.