UKZ qendër e shkëmbimit arsimor Kosovë–Zvicër gjatë Javës së Studimit për mësuesit nga PH Zug
Në Universitetin Publik “Kadri Zeka” në Gjilan po vazhdon Java e Studimit në kuadër të bashkëpunimit ndërmjet UKZ dhe Shkollës së Lartë Pedagogjike PH Zug nga Zvicra.
Mësues nga Gjilani dhe Zvicra po ndajnë përvoja, ide dhe praktika mësimor, të pasuruara me punëtori, diskutime dhe vizita shkollore, duke marrë pjesë në ligjërata akademike në UKZ, që synojnë shkëmbimin profesional dhe kulturor ndërmjet dy sistemeve arsimore.
Këto aktivitet të bashkëpunimit midis Universitetit të Edukimit të Mësuesve të Zugut/ PH Zug, Zvicër dhe Universitetit Publik “Kadri Zeka”, realizohen në kuadër të projektit të mbështetur nga Movetia, i cili synon shkëmbimin profesional dhe ndërkulturor midis mësuesve nga Kosova dhe Zvicra.
Ashtu si në javën e studimit në Zvicër, realizuar në muajin maj të këtij viti, ku pesë mësimdhënës nga katër shkolla fillore të Komunës së Gjilanit “Selami Hallaqi”, “Thimi Mitko”, “Musa Zajmi” dhe “Rexhep Elmazi”, morën pjesë në një sërë aktivitetesh akademike dhe profesionale gjatë qëndrimit në atje, edhe në këtë edicion të qëndrimit të mësimdhënësve nga PH Zug në Gjilan respektivisht në UKZ, në qendër të programit është vëzhgimi kolegial, një proces bashkëpunues ku mësuesit zviceranë vizitojnë kolegët e tyre kosovarë në shkolla dhe ndjekin nga afër procesin mësimor në klasë.
Qëllimi i kësaj forme bashkëpunimi është të krijohen hapësira për reflektim të përbashkët mbi metodologjinë e mësimdhënies, qasjet pedagogjike dhe ndërveprimin me nxënësit, duke ndërtuar ura të qëndrueshme komunikimi profesional.
Përveç këtij programi qendror, Java e Studimit po të përfshinë punëtori tematike, diskutime profesionale, prezantime studimore dhe aktivitete kulturore, që realizohen në bashkëpunim të ngushtë ndërmjet stafit të UKZ-së dhe kolegëve nga PH Zug.
Shpresa Jashari, pedagoge dhe hulumtuese në Universitetin e Edukimit të Mësuesve të Zugut, prezantoi temën që ndërlidhet me gjuhën, identitetin dhe përkatësinë.
“Të flasësh dhe të jesh shqiptar në Zvicër: Zgjedhja e gjuhës, qëndrimet ndaj gjuhës dhe negociimi i përkatësisë hapësinore në rrëfimet biografike”, ishte tema e prezantimit tw saj.
Ky prezantim paraqet një studim të thelluar mbi përvojat e shqiptarëve që jetojnë në Zvicër, duke ndriçuar mënyrën se si gjuha bëhet një element thelbësor në ndërtimin e identitetit personal dhe kolektiv. Përmes rrëfimeve biografike, Shpresa Jashari analizon se si shqiptarët në diasporë ndërveprojnë me gjuhën amtare dhe gjuhët e mjedisit ku jetojnë, si i perceptojnë dhe i përdorin ato për të negociuar përkatësinë e tyre kulturore dhe shoqërore.
Në thelb, studimi nënvizon rëndësinë e gjuhës si një hapësirë e kujtesës, lidhjes me rrënjët dhe integrimit të ndërsjellë, ku ngre pyetje të rëndësishme mbi ruajtjen e identitetit kulturor në një mjedis shumë gjuhësor, duke reflektuar njëkohësisht mbi rolin e shkollës dhe mësuesve në mbështetjen e kësaj përkatësie.
Prezantimi i Shpresa Jasharit shërbeu si një urë e rëndësishme mes përvojave të mësuesve nga Kosova dhe Zvicra, duke nxitur reflektime të reja mbi rolin e edukatorit në një botë gjithnjë e më të ndërlidhur ndërkulturor.
