UKZ pjesë e Panairit Universitar në Prishtinë
Universiteti Publik “Kadri Zeka” në Gjilan ka marrë pjesë në Panairin Universitar – Tetor 2025, i cili u mbajt më 15 tetor në Prishtinë. Ky panair, një ngjarje dinamike dhe mjaft e rëndësishme në fushën e arsimit, mblodhi së bashku universitete vendore e ndërkombëtare, institucione arsimore si dhe mbi 500 nxënës nga disa prej shkollave të mesme më të njohura në Kosovë.
Ngjarja u organizua nga Metaca, në bashkëpunim me Shkollën Ndërkombëtare të Prishtinës dhe Shkollat Mehmet Akif – Kosova, me qëllim që t’u ofrojë të rinjve një hapësirë informuese dhe orientuese mbi mundësitë e tyre akademike në Kosovë dhe jashtë saj.
Gjatë panairit, Universiteti Publik “Kadri Zeka” prezantoi programet e tij të studimit në nivel bachelor dhe master, si dhe informoi të interesuarit për kushtet e pranimit, drejtimet studimore, aktivitetet shkencore dhe projektet ndërkombëtare që zhvillohen në kuadër të universitetit.
Përfaqësuesit e UKZ-së u mirëpritën me interes të madh nga nxënësit, të cilët patën mundësinë të marrin informata të drejtpërdrejta për fakultetet, programet studimore, bursat, praktikat profesionale dhe mundësitë për zhvillim akademik dhe karriere që ofron universiteti.
Në fund të ngjarjes, përfaqësuesit e UKZ-së shprehën falënderim për organizatorët dhe theksuan rëndësinë që kanë këto aktivitete për afrimin e universiteteve me gjeneratat e reja që po përgatiten për të ndërtuar të ardhmen e tyre akademike.
