UKZ mbajti sot provimin pranues në nivelin baçelor për vitin akademik 2025/2026
Universiteti Publik “Kadri Zeka” në Gjilan ka mbajtur sot provimin pranues për studentët e rinj që synojnë të regjistrohen në vitin e parë të studimeve në nivelin baçelor, për vitin akademik 2025/2026.
Rektori i Universitetit Publik “Kadri Zeka”, Prof. Asoc. Dr. Artan Dërmaku, së bashku me prorektorët dhe dekanët e fakulteteve, kanë vizituar të gjitha sallat ku është zhvilluar provimi. Gjatë vizitës, ata janë njoftuar nga afër me rrjedhën e procesit, për të siguruar se gjithçka po zhvillohet sipas standardeve akademike dhe në kushte të barabarta për të gjithë kandidatët.
Rektori Prof. Asoc. Dr. Artan Dërmaku gjatë vizitës nëpër sallat ku u mbajt provimi pranues, ka theksuar rëndësinë e këtij procesi për Universitetin Publik “Kadri Zeka”.
“Ky është një moment i veçantë për të gjithë ata që sot kanë konkurruar për një vend në universitetin tonë. Ne jemi të përkushtuar që të ofrojmë një mjedis arsimor cilësor, gjithëpërfshirës dhe të sigurt për të ardhmen profesionale të studentëve tanë. Ju falënderoj për besimin e treguar ndaj institucionit tonë dhe ju dëshiroj shumë suksese në këtë fazë të rëndësishme të jetës suaj akademike,” është shprehur Rektori Prof. Asoc. Dr. Artan Dërmaku.
Procesi i testimit është zhvilluar në mënyrë të organizuar dhe transparente në të gjitha njësitë akademike të universitetit që ofrojnë studime baçelor, Fakultetin e Edukimit, Fakultetin Ekonomik, Fakultetin e Shkencave Kompjuterike, Fakultetin e Shkencave Sociale.
Rezultatet e provimit pranues pritet të publikohen brenda afateve të përcaktuara në konkursin zyrtar të shpallur më herët, ndërsa kandidatët e pranuar do të njoftohen për hapat e mëtejshëm të procesit të regjistrimit.
