UKZ dhe IKKL formalizojnë bashkëpunimin përmes Memorandumit të Mirëkuptimit
Universiteti Publik “Kadri Zeka” në Gjilan dhe Instituti i Krimeve të Kryera gjatë Luftës në Kosovë kanë nënshkruar Memorandum Bashkëpunimi, me synim thellimin dhe institucionalizimin e bashkëpunimit në fushën e arsimit, hulumtimit shkencor, dokumentimit historik dhe ndërgjegjësimit shoqëror lidhur me krimet e kryera gjatë luftës në Kosovë.
Memorandumi u nënshkrua nga Rektori i Universitetit Publik “Kadri Zeka”, Prof. Asoc. Dr. Artan Dërmaku, dhe Drejtori Ekzekutiv i Institutit të Krimeve të Kryera gjatë Luftës në Kosovë, Prof. Dr. Atdhe Hetemi.
Kjo marrëveshje bashkëpunimi ka për qëllim krijimin e një platforme të përbashkët për zhvillimin e projekteve edukative, shkencore dhe humanitare, si dhe organizimin e konferencave, seminareve, tryezave të diskutimit, punëtorive dhe aktiviteteve të tjera akademike që trajtojnë çështjet e krimeve të luftës, pasojat e tyre dhe proceset e ballafaqimit me të kaluarën në proceset që lidhen me dokumentimin dhe analizimin e krimeve të luftës në Kosovë.
Në kuadër të Memorandumit, do të ketë bashkëpunim të ndërsjellë në planifikimin dhe zbatimin e programeve edukative që ndërlidhen me historinë, dokumentimin dhe analizimin e krimeve të luftës në Kosovë. Një rëndësi e veçantë do t’i kushtohet ndarjes së burimeve dhe përvojave profesionale, përfshirë ekspertizën e stafit akademik, përfshirjen aktive të studentëve të Universitetit Publik “Kadri Zeka” në projekte hulumtuese, si dhe qasjen në bibliotekat dhe arkivat e Institutit për qëllime studimore dhe shkencore.
Po ashtu, marrëveshja parasheh organizimin e aktiviteteve të përbashkëta edukative dhe shkencore, me qëllim rritjen e ndërgjegjësimit publik mbi krimet e luftës dhe pasojat e tyre afatgjata, si dhe zhvillimin e iniciativave për bashkëpunim ndërkombëtar me institucione dhe organizata rajonale e ndërkombëtare që veprojnë në fushën e drejtësisë tranzicionale dhe të drejtave të njeriut.
Rektori i Universitetit Publik “Kadri Zeka”, Prof. Asoc. Dr. Artan Dërmaku, theksoi se ky bashkëpunim është në përputhje me misionin akademik dhe shoqëror të universitetit, duke theksuar rolin e arsimit të lartë në trajtimin e çështjeve me rëndësi kombëtare dhe shoqërore
“Ky Memorandum krijon mundësi konkrete për zhvillimin e studimeve serioze akademike në fusha me rëndësi të veçantë shoqërore dhe kombëtare, duke fuqizuar rolin e universitetit në edukimin e brezave të rinj dhe në ruajtjen e së vërtetës historike,” u shpreh Rektori Dërmaku.
Ndërkaq, Drejtori Ekzekutiv i IKKL-së, Prof. Dr. Atdhe Hetemi, vlerësoi se bashkëpunimi me UKZ-në do të kontribuojë në fuqizimin e mandatit të Institutit.
“Përmes këtij bashkëpunimi synojmë të ndërtojmë ura të qëndrueshme mes punës kërkimore të Institutit dhe arsimit universitar, duke krijuar hapësirë për përfshirjen e studentëve dhe stafit akademik në trajtimin shkencor të pesë kategorive të krimeve që përbëjnë mandatin tonë ligjor,” theksoi Prof. Dr. Hetemi.
Te dyja palët thanë se ky bashkëpunim është një hap të rëndësishëm drejt forcimit të lidhjes mes institucioneve akademike dhe atyre kërkimore shtetërore, duke kontribuar në avancimin e dijes, drejtësisë dhe ndërgjegjësimit shoqëror dhe proceseve të ballafaqimit me të kaluarën në Kosovë.
